Almaty oblysynda 60 myńnan astam adam qyzylshaǵa qarsy vaktsına aldy
Almaty oblysynda 60 myńnan astam adam qyzylshaǵa qarsy egildi, onyń alty myńy 6 aıdan 1 jasqa deıingi balalar, dep habarlaıdy Kazinform.
Oblystyq sanıtarlyq-epıdemıologııalyq baqylaý departamentiniń málimetinshe, óńirde qarasha aıynan beri qyzylshaǵa qarsy jappaı ımmýndaý júrip jatyr. Jappaı ımmýndaýmen 6 aıdan 1 jasqa deıingi balalar jáne 2 jastan 5 jasqa deıingi balalar men medıtsına qyzmetkerleri qamtyldy.
«Almaty oblysynda 60 myńnan astam adam qyzylshaǵa qarsy egildi, onyń alty myńy 6 aıdan 1 jasqa deıingi balalar», - dep atap ótti departamentten.
Almaty oblysynda zerthanalyq jolmen rastalǵan 2 myń jaǵdaı tirkeldi. Qyzylshamen aýyrǵandar Qarasaı, Eńbekshiqazaq, Talǵar, Іle aýdandarynda turady. Onyń basym bóligi 5 jasqa deıingi balalar arasynda (71 paıyz) anyqtaldy.
