Almaty oblysynda 58 keliden astam marıhýana tárkilendi
ASTANA. KAZINFORM — Almaty oblysynda «Qarasora-2025» jedel-profılaktıkalyq is-sharasy aıasynda polıtseıler Ulttyq qaýipsizdik komıtetiniń qyzmetkerlerimen birlesip, esirtkiniń iri zańsyz tasymal arnasyn anyqtady. Bul týraly ІІM baspasóz qyzmeti habarlady.
«Almaty — Bishkek» avtojolynyń 58-shaqyrymynda oblystyq polıtsııa departamentiniń esirtki qylmysyna qarsy is-qımyl basqarmasy Jambyl aýdany polıtsııa basqarmasynyń jáne patrýldik polıtsııa batalonynyń kúshimen Toyota Camry avtokóligi toqtatyldy. Kólikti tekserý kezinde júksalǵyshynan qara polıetılen qaptarǵa oralǵan úsh polımer qap tabyldy. Onyń ishinen erekshe ıisi bar jasyl tústi ósimdik tektes zat shyqty.
Saraptama qorytyndysy boıynsha bul — keptirilgen marıhýana ekeni anyqtaldy.
Tárkilengen esirtkiniń jalpy salmaǵy 58 keli 560 gramm. Atalǵan derek boıynsha esirtki zattaryn zańsyz satyp alý, saqtaý jáne tasymaldaý faktisi boıynsha qylmystyq is qozǵaldy. 55 jastaǵy kúdiktige bultartpaý sharasy retinde qamaýǵa alý sanktsııalanyp, ol ýaqytsha ustaý ızolıatoryna qamaldy.
Quqyq qorǵaýshylardyń aıtýynsha, esirtkini zańsyz saqtaý, tasymaldaý jáne taratý aýyr qylmys bolyp sanalady jáne qatań qylmystyq jaýapkershilikke ákeledi.
Aıta ketelik SQO-da bıyl esirtki saýdasymen ustalǵandardyń deni 25 jasqa deıingi jastar ekenin jazǵan edik.