Almaty oblysynda 46 jastaǵy áıel ómirinde alǵash ret jeke kýálik almaq
ALMATY. KAZINFORM – Almaty oblysynyń Alataý qalasynda prokýratýranyń aralasýymen 46 jyl boıy jeke basyn kýálandyratyn qujatsyz jáne jeke sáıkestendirý nómirinsiz (JSN) ómir súrgen áıeldiń týý faktisi sot arqyly anyqtaldy.
Belgili bolǵandaı, 1980 jyly áıeldiń anasy onyń dúnıege kelgenin azamattyq hal aktilerin tirkeý organdarynda tirkemegen.
Al sol kezeńdegi medıtsınalyq muraǵat qujattary saqtaý merziminiń aıaqtalýyna baılanysty joıylǵan. Sondyqtan áıeldiń týýyna qatysty qujattardy sottan tys tártippen qalpyna keltirý múmkin bolmaǵan.
JSN-i bolmaǵandyqtan, áıel sotqa óz betinshe júgine almaǵan. Buǵan deıin ápkesiniń bergen ótinishi de qanaǵattandyrylmaǵan.
– Azamatshanyń quqyqtaryn qorǵaý maqsatynda Alataý qalasynyń prokýratýrasy sotqa onyń týý faktisin anyqtaý týraly talap qoıýmen júgindi. Sot talapty qanaǵattandyrdy, – dep habarlady prokýratýra.
Endi áıel jeke basyn kýálandyratyn qujattaryn rásimdeı alady. Bul oǵan medıtsınalyq kómek alýǵa, resmı túrde jumysqa ornalasýǵa jáne memlekettik áleýmettik qoldaý sharalaryn paıdalanýǵa múmkindik beredi.
Aıta keteıik, buǵan deıin Túrkistan oblysynda 30 jyl boıy týý týraly kýáliksiz ómir súrgen azamattyń dúnıege kelgeni sot arqyly rastalǵan edi. Onyń ata-anasy 1994 jyly týý týraly qujattaryn rásimdemegen.
