Almaty oblysynda 446 jer ýchaskesi paıdalanylmaı jatyr

QONAEV.KAZINFORM – Almaty oblysynda 16 myń gektardan astam paıdalanylmaı jatqan aýyl sharýashylyǵy maqsatyndaǵy jer memleket menshigine qaıtaryldy.

Oblystyq jer qatynastary basqarmasynan málim etkendeı, jyl basynan beri jalpy alańy 50 083 gektar bolatyn, 446 jer ýchaskesiniń paıdalanylmaı jatqany anyqtaldy.

– Qazir 8 214 gektar bolatyn 71 jer ýchaskesi boıynsha materıaldar Jer resýrstaryn basqarý departamentine joldanyp, jumysqa qabyldandy. Sonymen qatar 23 747 gektar aýmaqtaǵy 37 jer ýchaskesi boıynsha talap-aryzdar sot qaraýynda, al jalpy kólemi 2 486,0 gektar bolatyn ýchaske boıynsha sot sheshimi shyǵyp, memleket menshigine qaıtaryldy, - dep habarlady basqarmadan.

Jyl basynan beri erikti túrde memleket menshigine 14 481,32 gektar jer qaıtaryldy. Eń kóp qaıtarylǵan aýmaqtar Jambyl (3 119,0 ga), Balqash (7 961,87 ga) jáne Kegen (1 893,0 ga) aýdandaryna tıesili. Jalpy alǵanda, 2025 jyldyń basynan beri memleket menshigine qaıtarylǵan jer kólemi – 16 967 gektar.

– Sonymen qatar jalǵa alý sharttarynyń oryndalýyna baqylaý kúsheıtildi. Jalpy kólemi 30 827,87 gektar jerdi paıdalanyp otyrǵan 216 adamǵa shart talaptaryn buzǵany úshin eskertý jiberildi. Talaptar oryndalmaǵan jaǵdaıda materıaldar sot organdaryna joldanady, - dep atap ótti vedomstvodan.

Buǵan deıin Almaty oblysy 90 myń gektar jerdi memleket menshigine qaıtaratyny týraly jazǵan edik.