Almaty oblysynda 31 mektep úsh aýysymda: 1 qyrkúıekte másele sheshile me

QONAEV. KAZINFORM - Almaty oblysy Bilim basqarmasynyń málimetine sáıkes, óńirde 437 memlekettik jalpy bilim beretin mektep bar, onda 351 884 oqýshy bilim alady. Jekemenshik mektepter sany - 46, onda 16 412 oqýshy oqıdy. Barlyǵy 33 349 muǵalim dáris beredi. 

31 memlekettik mektepte balalar úsh aýysymda oqyp júr. Al 406 memlekettik mektep 2 aýysymda oqytylady. Kazinform saýalyna jaýap bergen Bilim basqarmasy úsh aýysymda oqytý máselesin sheshý úshin 22 mektep salý qajet ekenin málimdedi. 

— Úsh aýysymda oqytýdy joıý úshin 22 mektep salý qajettiligi bar, oqýshylar úıi, jazǵy demalys lagerleri qajet. Qazirgi ýaqytta Almaty oblysynda 19 mekteptiń qurylysy júrip jatyr. Taǵy 19 mektepke kúrdeli jóndeý jumystaryn jasaý josparlanǵan. Kúrdeli jóndeý jumystary jazǵy kanıkýl kezinde júrgiziledi, - dep habarlady basqarmadan. 

Resmı jaýapqa sáıkes, 2025 jyldyń 1 qyrkúıeginde 17 mektep «Jaıly mektep» ulttyq jobasymen, 1 mektep jergilikti bıýdjet esebinen, 1 jekemenshik mektep ashylady. 

Buǵan deıin jer dúmpýi kezinde zaqymdanǵan Almaty oblysyndaǵy mektep 1,5 mlrd teńgege kúrdeli jóndeýden ótetinin jazǵan edik. 

Eske salaıyq, osy jyldyń 1 qyrkúıeginde Almatyda 15 mektep ashylady.