Almaty oblysynda 309 tonna qulpynaı men 15 myń tonnadan astam qarbyz jınaldy

ASTANA. KAZINFORM – Almaty oblysynda jıdek pen baqsha daqyldaryn jınaý naýqany qarqyndy júrip jatyr. Aýa raıynyń qolaılyǵy men fermerlerdiń tıimdi agrotehnıkalyq tásilderdi qoldanýy joǵary ónim alýǵa múmkindik berdi.

Oblystyq aýyl sharýashylyǵy basqarmasynyń málimetinshe, qulpynaı bıyl úsh aýdanda 61 gektar alqapta ósirilgen. Jalpy jınalǵan ónim kólemi – 309 tonna. Onyń basym bóligi Eńbekshiqazaq aýdanyna (170 t) tıesili. Odan keıin Talǵar (74 t) jáne Qarasaı (65 t) aýdandary ornalasqan. Ortasha ónimdilik gektaryna 50,7 tsentnerdi qurady.

Baqsha daqyldarynyń ishinde qarbyzdan joǵary ónim jınaldy. 700 gektar jerden 15,7 myń tonna ónim alyndy. Bul ár gektardan orta eseppen 234 tsentner tátti ónim alynǵanyn kórsetedi.

– Bıyl fermerler jaqsy nátıje kórsetti. Jergilikti ónimge suranys jyldan-jylǵa artyp keledi. Bizdiń basty mindetimiz – naryqty sapaly jáne jańa pisken ónimmen qamtamasyz etý, – dedi Almaty oblysy aýyl sharýashylyǵy basqarmasynyń basshysy Ǵalym Tókpeısov.

Agroónerkásiptik keshen óńir úshin negizgi basymdyqtardyń biri sanalady. Oblysta aýyl sharýashylyǵyn damytýǵa baǵyttalǵan memlekettik qoldaý tetikteri — sýbsıdııalar, jeńildetilgen nesıeler jáne ınfraqurylymdyq jobalar iske asyrylyp jatyr. Bul sharalar óńirdiń azyq-túlik qaýipsizdigin nyǵaıtýǵa sep bolmaq.

Aıta keteıik, Keleste alǵashqy qarbyzdar satylymǵa shyqty.