Almaty oblysynda 260 keli balyqty zańsyz aýlaǵan brakonerler sottaldy
QONAEV. KAZINFORM — Almaty oblysy Balqash aýdandyq soty brakonerlerge qatysty úkim shyǵardy.
Aýdandyq sotta balyq resýrstaryn zańsyz alý (QR QK 335-baby 3-bóligi 4,5-tarmaqtary) faktisi boıynsha qylmystyq is qaraldy. Sot málimetinshe, 2025 jyldyń 30 qazanynda «Brakoner» jedel-izdestirý is-sharasy barysynda Balqash kólinde polıtsııa jáne balyq sharýashylyǵy ınspektsııasynyń qyzmetkerleri T. jáne P. esimdi azamattardy ustaǵan. Olar«Yamaha-40» motory bar qaıyq pen uzyndyǵy 500 metrlik sıntetıkalyq tordy paıdalanyp, 261 keli balyqty zańsyz aýlaǵan. Osylaısha memleketke 1 277 506 teńge kóleminde aıtarlyqtaı zalal keltirilgen.
— Sot úkimimen T. kináli dep tanylyp, oǵan 3 jyl merzimge balyq aýlaý quqyqynan aıyra otyryp, 3 jylǵa bas bostandyǵyn shekteý jazasy taǵaıyndaldy. Oǵan probatsııalyq baqylaý belgilenip, jylyna 100 saǵat májbúrli eńbekke tartý mindetteldi. Keltirilgen zalaldyń qalǵan somasy sottalýshydan tolyq óndirildi. Jaza taǵaıyndaý barysynda sot T.-nyń óz kinásin tolyq moıyndap, shyn júrekten ókingenin, sondaı-aq memleketke keltirilgen zalaldyń basym bóligin (890 000 teńge) óz erkimen ótegenin qylmystyq jaýaptylyqty jeńildetetin mán-jaılar retinde tanydy, — delingen habarlamada.
Al ekinshi azamat P. quqyq buzýshylyqty jasaý kezinde psıhıkalyq jaǵdaıyna baılanysty óz is-áreketine esep bere almaıtyn kúıde bolǵany anyqtalyp, QR Qylmystyq kodeksiniń 16 jáne 75-baptaryna sáıkes qylmystyq jaýaptylyqtan bosatyldy. Sonymen qatar, QK-niń 93, 95-baptary negizinde sot oǵan turǵylyqty jeri boıynsha dárigerlik baqylaýdan ótý (ambýlatorııalyq emdelý) sharalaryn belgiledi.
Úkim zańdy kúshine endi.
Eske salaıyq, buǵan deıin batysta brakonerlerden 8 tonnadan asa balyq pen 10 keli ýyldyryq tárkilengeni belgili boldy.
