Almaty oblysynda 26 jyl qujatsyz júrgen azamat jeke kýáligin aldy
ASTANA. KAZINFORM – Almaty oblysynyń Іle aýdanynda týǵannan beri qujatsyz júrgen azamatqa jeke basyn kýálandyratyn qujattardy rásimdeýge múmkindik beretin sot sheshimi shyqty.
Іle aýdandyq prokýratýrasyna 2000 jyly týǵan Soltústik Qazaqstan oblysynyń týmasy óz quqyqtaryn qorǵaý máselesi boıynsha júgingen.
Prokýratýranyń málimetinshe, azamat ómirlik jaǵdaılarǵa baılanysty týǵan kezinen bastap zańnamada belgilengen tártippen tirkelmegen. Sonyń saldarynan ol 26 jyl boıy týý týraly kýálik pen jeke basyn kýálandyratyn qujat ala almaǵan.
«Qujattardyń bolmaýy onyń memlekettik qyzmetterdi alýyna, medıtsınalyq kómekke júginýine, resmı túrde jumysqa ornalasýyna jáne memleket kepildik bergen ózge de áleýmettik quqyqtaryn tolyq kólemde paıdalanýyna múmkindik bermegen», – dep habarlady prokýratýra.
Azamat túrli memlekettik organdarǵa birneshe ret júgingenimen, másele uzaq ýaqyt boıy sheshimin tappaǵan.
Tekserý barysynda prokýratýra qajetti qujattardy jınap, kýágerlerden túsinikteme alyp, azamattyń týý faktisin rastaıtyn ózge de dálelderdi anyqtaǵan.
Osydan keıin Іle aýdandyq prokýratýrasy sotqa azamattyń týý faktisin, jeke derekterin anyqtaý jáne memlekettik tirkeýden ótkizý týraly talap qoıýmen júgingen.
Sot prokýrordyń talaptaryn tolyq kólemde qanaǵattandyrdy.
«Qabyldanǵan sot sheshimi azamatqa jeke basyn kýálandyratyn qujattardy rásimdeýge, zańdy quqyqtaryn tolyq kólemde júzege asyrýǵa jáne qoǵamdyq ómirge tolyqqandy qatysýǵa múmkindik beredi», – delingen habarlamada.
Aıta keteıik, bqǵan deıin polıtseıler 33 jyl qujatsyz júrgen turǵynǵa kómekteskeni habarlandy.
