Almaty oblysynda 24 jastaǵy jigit pyshaq jaraqatynan kóz jumdy: úsh kúdikti ustaldy
QONAEV. KAZINFORM – Almaty oblysy Talǵar aýdany Nura aýylynda er adam pyshaq jaraqatynan mert boldy.
Oblystyq Polıtsııa departamentiniń málimetinshe, 11 mamyrda Nura aýylynyń 24 jastaǵy turǵyny aýrýhanada kóz jumǵan. Oǵan belgisiz adamdar pyshaq suqqan.
- Oqıǵa týraly habarlama túsken boıda polıtsııanyń barlyq syrtqy jasaǵyna baǵyt-baǵdar berilip, blokpostar qoıyldy. Jedel-izdestirý is-sharalarynyń nátıjesinde, qylmys jasady degen kúdikpen marqumnyń úsh aýyldasy ustaldy, - dep habarlady departamentten.
Atalǵan derek boıynsha «Adam óltirý» jáne «Buzaqylyq» baptary negizinde qylmystyq is qozǵaldy. Qazirgi ýaqytta oqıǵanyń barlyq mán-jaıyn anyqtaýǵa baǵyttalǵan tergeý amaldary júrgizilip jatyr.
Kúdiktiler ýaqytsha ustaý ızolıatoryna qamalǵan.
- Tergeý barysy oblystyq Polıtsııa departamenti basshylyǵynyń erekshe baqylaýynda, - dep naqtylady óńir polıtsııasy.
Eske salaıyq, 2024 jyly Talǵarda uqsas jaǵdaıda 16 jastaǵy Sherzat Polat mert boldy. Jasópirimniń ólimi qoǵamda úlken rezonans týdyrdy.
2025 jyldyń 5 maýsymynda sot úkimimen 16 jastaǵy Sherzat Polattyń ólimine qatysty 9 adam 1,5 jyldan 23 jylǵa deıin sottaldy.
