Almaty oblysynda 23 zańsyz qurylystyń isi sotqa joldandy

QONAEV. KAZINFORM — Almaty oblysynyń Memlekettik sáýlet-qurylys baqylaý basqarmasy júrgizilgen aýqymdy tekserister nátıjesinde qurylys normalary men erejelerin buzýdyń júzdegen faktisin anyqtaǵan.

Tekseristerdiń qorytyndysy boıynsha 78 ákimshilik materıal ázirlengen. Olardyń 28-i oblystyq sottarǵa joldansa, qylmystyq is qozǵalmaǵan quqyqbuzýshylarǵa jalpy somasy 14 644 140 teńge aıyppul salyndy.

Sondaı-aq, tekserister barysynda 23 zańsyz qurylys nysany anyqtaldy. Olardyń materıaldary da sotqa joldandy. Zańsyz salynǵan qurylystar, onyń ishinde Talǵar aýdanyndaǵy kópqabatty turǵyn úı kesheni, buzylýy tıis. Qazirgi ýaqytta 4 saban úı buzyldy, al 7 nysanǵa buzý týraly talap-aryzdar joldandy.

— Qonaev qalasyndaǵy oqý korpýsy, «Eco-Park Alatau» turǵyn úı kesheniniń káriz jelileri jáne Raıymbek aýdanyndaǵy sý bógetteri qurylysy barysynda kóptegen buzýshylyq anyqtaldy. Jaýapqa tartylǵan merdigerler men tehnıkalyq qadaǵalaý uıymdaryna qatysty sharalar qabyldandy. 61 qurylys kompanııasy jaýapqa tartyldy, onyń ekeýi — TOO «Sheberbuild» jáne TOO «Jańartý» — sot sheshimimen lıtsenzııasynan aıyrylǵan, — dep habarlady basqarmadan.

Eske salaıyq, buǵan deıin Almatyda tozyǵy jetken 34 kópqabatty úı buzylǵanyn jazǵanbyz.