Almaty oblysynda 213 myń gektar jer memleketke qaıtaryldy
Bıyl «AMANAT» partııasynyń bastamasymen óńirde ıgerilmeı jatqan jer ýchaskeleri memleketke qaıtaryldy. Bul týraly «Jer amanaty» respýblıkalyq komıssııasynyń kóshpeli otyrysynda aıtyldy, dep habarlaıdy Kazinform.
Partııa Almaty oblystyq fılıalynyń málimetinge, óńirge is saparymen kelgen partııanyń atqarýshy hatshysy, «Jer amanaty» komıssııasynyń tóraǵasy Dáýlet Káribek, komıssııa tóraǵasynyń orynbasary, Májilis depýtaty Baqytjan Bazarbek, AShM Jer resýrstaryn basqarý komıtetiniń tóraǵasy Murat Temirjanov Eńbekshiqazaq aýdanyna qarasty Masaq aýyldyq okrýginiń turǵyndarymen kezdesti.
Kezdesýde Dáýlet Káribek oblys boıynsha memleket menshigine qaıtarylǵan jaıylymdyq jerler aýyldyq okrýgterge berilgenin atap ótti.
«Alataýdaı bıik tulǵaly almatylyq aǵaıyn úshin Asy jaılaýynyń qadiri men qasıeti bólek. Buny biz jyl basynda óńirge kelgende erekshe ańǵardyq. Eki jarym myń metr bıiktikte en jaılaǵan qasterli mekenniń jekege ótip ketkeni jergilikti jurttyń qabyrǵasyna qatty batqan. Máselen, Masaq aýyldyq okrýgi turǵyndarynyń «Buǵyty» aýmaǵyndaǵy kólemi 2,4 myń gektar jer ýchaskesi jekeniń qolynda ekenin aıtyp shaǵymdanǵan bolatyn. Bizder, bul máseleni baqylaýda ustap, jyl sońyna deıin qaıta kelemiz dep ýáde bergen edik», – dedi ol.
Aıtýynsha, araǵa 5 aı salyp, halyqtyń mal jaıý muqtajyn qanaǵattandyrý maqsatynda jaılaýdyń birshama bóligi memleket menshigine qaıtarylǵan.
«Osy oraıda oblys boıynsha barlyǵy 213,5 myń ga jaıylymdyq jerler aýyldyq okrýgterge berilgenin erekshe atap ótkenimiz jón. Bul jumystardyń barlyǵy «Jer Amanaty» komıssııasynyń jergilikti atqarýshy organdarmen birlese otyryp atqarǵan jumystarynyń nátıjesi. Bul, ıgilikti istiń basy ǵana. Kezinde jerge qısynsyz ıelik etip, jaıylym jerdiń tapshylyǵyn qoldan jasaýshylarmen kúres áli de jalǵasa bermek», – deıdi komıssııa tóraǵasy.
Aldyn ala júrgizilgen saraptama qorytyndysy boıynsha Eńbekshiqazaq aýdanynyń ózinde nysanaly maqsatyna sáıkes paıdalanylmaıtyn 121,2 myń gektar aýyl sharýashylyǵy jeri anyqtalyp, bıyl osy jer kóleminiń 43,4 myń gektardan astamy memleket menshigine qaıtarylǵan.
Májilis depýtaty Baqytjan Bazarbek jaıylym máselesi Qazaqstannyń túkpir-túkpirinde óte ózekti bolyp turǵanyn aıtty.
«10 mln gektarǵa jýyq jer qaıtaryldy. Biz zańǵa «qoǵamdyq jaıylym» degen uǵymdy engizip otyrmyz. «Qoǵamdyq jaıylym» degen uǵymmen qosa, endi jemqorlyqqa belshesinen batqan ákimder qoǵamdyq jaıylymdy jerlerdi eshkimge berýge quqyǵy joq. Sebebi ol bazaǵa qoǵamdyq jaıylymdyq jerler retinde engiziletin bolady. Sonymen qatar, naqty bir eldi mekende sońǵy 5 jyl turǵan azamat endi jer alý kezinde qosymsha upaıǵa ıe bolady. Jaıylymdy jerlerdi egistik jerlerge aınaldyrýǵa bolmaıdy. Sondaı-aq endi ákimder jaıylymdy jerlerdi rezervke qoıýǵa mindetteledi», – deıdi depýtat.
Aıta ketý kerek, «AMANAT» partııasynyń óńirlik saılaýaldy baǵdarlamasynda 2027 jylǵa deıin 260 myń gektar jer telimin memleket menshigine qaıtarý mindeti tur.
Qazir bul jospar 82 paıyzǵa oryndaldy.
