Almaty oblysynda 2031 jylǵa deıin taǵy 18 jańartylatyn energııa nysany salynady
ASTANA. KAZINFORM- Almaty oblysynda elektr jáne jylýmen jabdyqtaý ınfraqurylymyn jańǵyrtý, gazdandyrýdy keńeıtý jáne jańartylatyn energııa kózderin damytý baǵytynda birqatar joba josparlanǵan. Bul týraly óńir turǵyndarymen kezdesken Energetıka vıtse-mınıstri Baqytjan Іlııas málimdedi.
Kezdesý barysynda vıtse-mınıstr oblystyń otyn-energetıka kesheniniń qazirgi jaı-kúıi týraly baıandady.
Óńirdiń elektr energetıkasy keshenine jalpy belgilengen qýaty 664 MVt bolatyn Qapshaǵaı jáne Moınaq sý elektr stantsııalary, sondaı-aq jylýmen jabdyqtaýdy qamtamasyz etetin oblystyq qazandyqtar kiredi.
2026 jyly Alataý qalasynda elektrmen jabdyqtaý jelileri men jylýmen jabdyqtaý nysandaryn jańǵyrtýǵa baǵyttalǵan bes jobany iske asyrý kózdelgen. Sonymen qatar Indýstrııalyq aımaqta «Arna» qosalqy stantsııasyn jáne Qonaev qalasynda «Kókshil» qosalqy stantsııasyn salý josparlanyp otyr.
Gazdandyrý máselelerine de erekshe nazar aýdaryldy. Búginde Almaty oblysynda shamamen 1,2 mln adam tabıǵı gazben qamtamasyz etilgen, al óńirdi gazdandyrý deńgeıi 77,8%-dy quraıdy. 2027–2028 jyldary «Shelek–Kegen–Narynqol» magıstraldyq gaz qubyryn jáne Qonaev qalasynda «Jańa Іle» avtomattandyrylǵan gaz taratý stantsııasyn salý josparlanǵan.
Almaty oblysynyń jańartylatyn energııa kózderin damytý áleýeti de joǵary. Óńir belgilengen qýaty 376,3 MVt bolatyn 27 jańartylatyn energııa kózderi nysany boıynsha respýblıkada tórtinshi orynda tur. 2031 jyldyń sońyna deıin jalpy qýaty 246,24 MVt bolatyn taǵy 18 jańartylatyn energetıka nysanyn salý kózdelgen.
Kezdesý barysynda oblys turǵyndary kommýnaldyq jáne energetıkalyq ınfraqurylymdy jańǵyrtý, elektrmen jabdyqtaý jelilerine qosylý jáne eldi mekenderdi odan ári gazdandyrý máselelerin kóterdi.
Baqytjan Іlııas turǵyndardyń saýaldaryna jaýap berip, aıtylǵan ótinishter men usynystardyń Energetıka mınıstrliginiń baqylaýynda bolatynyn atap ótti.
Qazaqstan energetıkasyn aldaǵy jyldary qandaı ózgeris kútip turǵany týraly sarapshy pikirin myna jerden bile alasyzdar.
