Almaty oblysynda qurǵaq shóp pen qamys órti tolyq sóndirildi
QONAEV. KAZINFORM - Almaty oblysynyń Eńbekshiqazaq aýdanynda, Nurly aýylynan shamamen 20 shaqyrym jerde, Іle ózeniniń mańyndaǵy ashyq aýmaqta qurǵaq shóp pen qamys janǵan, dep habarlaıdy QR Tótenshe jaǵdaılar mınıstrliginiń baspasóz qyzmeti.
-Órtti sóndirý jumystary batpaqty ári jetýi qıyn jer bederine, sondaı-aq órt oshaǵyna aparatyn joldardyń bolmaýyna baılanysty qıyndady. Órt sóndirý jáne aýyr tehnıkanyń órt oshaǵyna jetýin qamtamasyz etý úshin kirme jol salyndy. Oqıǵa ornynda TJM qyzmetkerleri, Shelek orman sharýashylyǵynyń mamandary jáne «Qazavıaspas» AQ tikushaqtarynyń ekıpajdary jumys istedi,-delingen habarlamada.
Órtti sóndirýge barlyǵy 90-ǵa jýyq adam, 30 - dan astam tehnıka jáne «Qazavıaspas» AQ eki tikushaǵy jumyldyryldy. Áýe kemeleri 55 ret sý tókti.
110 gektar aýmaqty sharpyǵan órt tolyǵymen sóndirildi. Zardap shekkender joq.
Osyǵan deıin ShQO-da 20 gektarǵa jaıylǵan orman órti oqshaýlanǵany týraly jazdyq.
