Almaty oblysynda 19 jastaǵy jigit basqarǵan dropperler toby ustaldy
QONAEV. KAZINFORM – Almaty oblysynyń tártip saqshylary shamamen 250 mıllıon teńge kóleminde zalal keltirgen aýqymdy ınternet-alaıaqtyq shemasyn áshkereledi.
Jedel-izdestirý is-sharalarynyń nátıjesinde oblystyq kıberqylmysqa qarsy kúres basqarmasynyń qyzmetkerleri Almaty qalasy men Almaty oblysy aýmaǵynda áreket etken qylmystyq toptyń uıymdastyrýshysy men úsh sybaılasyn ustaǵan.
— Uıymdastyrýshy nebári 19 jasta, Almaty oblysynyń turǵyny. Tergeý málimetinshe, ol qylmystyq shemaǵa 2023 jyldyń qazan aıynan beri qatysqan. Aldymen qarapaıym «drop» retinde bastasa, 2024 jyldyń maýsymynan bastap dropperlerdi basqarýǵa kóshken. 2025 jyldyń qańtarynan bastap kýrator retinde áreket etip, úsh dropperdi basqaryp kelgen, — dep habarlady Almaty oblysynyń polıtsııa departamentinen.
Polıtsııa málimetinshe, urlanǵan qarajatty qolma-qol aqshaǵa aınaldyrý úshin qaskóıler 50-den astam jalǵan tulǵaǵa rásimdelgen banktik qosymshalary bar 30-dan astam mobıldi qurylǵyny paıdalanǵan. Sondaı-aq noýtbýk, Reseı baılanys operatorlaryna tıesili 11 SIM-karta jáne sheteldik qarjy uıymdarynyń banktik kartalary tárkilengen.
Aldyn ala esepteý boıynsha, kýrator qylmystyq áreket barysynda shamamen 10 mıllıon teńge tabys tapqan, al onyń sybaılastarynyń árqaısysy 3 mıllıon teńge ıemdengen.
Qylmystyq shemaǵa qatysy bar barlyq tulǵa ustalyp, Almaty oblystyq polıtsııa departamentine jetkizildi. Qazirgi ýaqytta qajetti tergeý amaldary júrgizilip jatyr.
Eske salaıyq, ınternet alaıaqtarǵa qurbandyq taýyp beretin dropperlerge qylmystyq jaza kúsheıtiledi.