Almaty oblysynda 18,1 mlrd teńgege jylyjaı kesheni salynyp jatyr
ASTANA. KAZINFORM- Almaty oblysynda quny 18,1 mlrd teńge bolatyn zamanaýı, tolyq óndiristik tsıkldi jylyjaı keshenin salý jobasy júzege asyrylyp jatyr. Keshenniń jyldyq óndiristik jáne qoımalyq qýaty 12 myń tonnaǵa deıin jemis-kókónis ónimin quraıdy, dep habarlaıdy QR Aýyl sharýashylyǵy mınıstrliginiń baspasóz qyzmeti.
Jobany «Alatau Green Production» seriktestigi qolǵa alǵan. Keshenniń jalpy aýmaǵy 16 gektardy quraıdy. Onyń 8 gektaryna kókónis daqyldarynyń joǵary ónimdi býdandaryn ósirý josparlanyp otyr.
Joba otandyq jemis-kókónis ónimderin óndirý kólemin ulǵaıtýǵa, olardy saqtaý ınfraqurylymyn damytýǵa jáne ishki naryqty azyq-túlik ónimderimen qamtý deńgeıin arttyrýǵa baǵyttalǵan.
Joba aıasynda maýsymdyq kókónis ónimderiniń sapasyn saqtaı otyryp, uzaq ýaqyt boıy saqtaýǵa arnalǵan qoıma jáne ınjenerlik ınfraqurylym da qurylady.
Jobany iske asyrý nátıjesinde 400-den astam jańa jumys orny ashylady.
Investordyń esepteýinshe, kásiporynnyń iske qosylýy óńir ekonomıkasynyń damýyna qosymsha serpin berip, Almaty oblysynyń jalpy óńirlik ónimin jyl saıyn 8–10 mlrd teńgege arttyrýǵa múmkindik beredi.
Óndiris kóleminiń ulǵaıýy, ónimdi saqtaý ınfraqurylymynyń damýy jáne deldaldar sanyn azaıtý esebinen áleýmettik mańyzy bar azyq-túlik ónimderiniń baǵasyn 10%-ǵa tómendetý kózdelip otyr.
Qazirgi ýaqytta Almaty oblysynda jalpy aýmaǵy 87,2 gektardy quraıtyn 49 jylyjaı sharýashylyǵy jumys isteıdi. Onyń ishinde 19-y ónerkásiptik jáne 19-y sharýa qojalyqtaryna tıesili jylyjaılar.
Jylyjaılarda óndiriletin ónim kólemi 15,9 myń tonnany qurady. Onyń ishinde 9,3 myń tonnasy – qyzanaq, 5,8 myń tonnasy – qııar, 0,8 myń tonnasy – kók shóp.
Óndirilgen ónimniń negizgi bóligi Almaty qalasy men Almaty oblysynda satylady. Sonymen qatar óńir kásiporyndary ónimderin sheteldik naryqtarǵa da shyǵarady. Jylyjaı ónimderiniń eksport kólemi 1 434,3 tonnany qurady.
Osyǵan deıin Túrkistan oblysynda jylyjaılardy ekologııalyq tıimdi jylytý joldary engizilip jatqany týraly jazdyq.
