Almaty oblysynda 180 myńnan astam abonentke kommýnaldyq mekeme sapasyz qyzmet kórsetýde
QONAEV. KAZINFORM – Almaty oblysynyń prokýratýrasy ákimdikpen jáne ýákiletti organmen birlese otyryp, «erkin monopolıstterdi «kóleńkeden shyǵarý» jobasyn bastady.
Almaty oblysy prokýratýrasynyń málimetinshe, Іle, Qarasaı jáne Talǵar aýdandarynda 180 myńnan astam abonentke sý jáne elektrmen jabdyqtaý boıynsha 92 erkin monopolıst jáne 244 ıesiz transformator sapasyz qyzmetter kórsetýde.
Mundaı faktilerdi oblys prokýratýrasy Memleket basshysynyń ulttyq quryltaıynda ınjenerlik jelilerdi jańǵyrtý qajettiligi, sondaı-aq kommýnaldyq qyzmetterdiń sapasy men senimdiligin azamattar men bıznes úshin jaqsartý týraly tapsyrmalar berilgen «Adal adam - Adal eńbek - Adal tabys» tapsyrmasyn oryndaý kezeńinde birinshi kezekte belgilegen.
«Bul másele júıeli jáne jyldar boıy jınaqtalǵan. Negizgi sebep jańa eldi mekenderdi qura otyryp, Almaty qalasynyń aınalasyndaǵy haotıkalyq qurylys boldy. Kásipker azamattar monopolııaǵa qarsy organnyń ruqsatynsyz, baılanys jelilerin tartyp, tarıfterdi óz erkimen belgileı bastady. Kóptegen azamattar jyldar boıy jóndelmeıtin, jańǵyrtylmaıtyn, qaraýsyz, ıesiz qalǵan jelilerge qosylǵan. Bul azamattar óz qalaýy boıynsha erkin monopolısttermen belgilegen tarıfterdi tóleıdi jáne tozyǵy jetken transformatorlardan elektr energııasyn alady», - dep habarlady Almaty oblysy prokýratýrasy.
Atalǵan problemalardy sheshý úshin oblys prokýratýrasy ákimdikpen jáne ýákiletti organmen birlese otyryp, «erkin monopolıstterdi «kóleńkeden shyǵarý» jobasyn bastady.
«Bul tarıfterdi retteýge, jelilerdi jóndeýdi jáne jańǵyrtýdy qamtamasyz etýge, bıýdjetke salyqtardyń túsýin, eń bastysy turǵyndar úshin alynatyn qyzmetterdiń sapasyn jaqsartýǵa múmkindik beredi. Jobany oryndaý aıasynda sandar ósedi, alaıda bul jınaqtalǵan máseleniń aýqymyna jaryq berip, ony sheshý úshin naqty sýretti kórýge múmkindik beredi», - delinedi Almaty oblysy prokýratýrasy taratqan habarlamada.
Eske salsaq, 30 naýryzda Almaty oblysynda Voroshılov sý qoımasynyń bógeti buzyldy. Osyǵan baılanysty oblys prokýratýrasy qylmystyq isti tirkegen edi.
