Almaty oblysynda 1,8 mln gektar jer shegirtkege qarsy baqylaýǵa alynady

Bıyl óńirde jalpy 1 831 690 gektar aýmaqta monıtorıng júrgizý josparlanǵan. Onyń ishinde 1 650 700 gektarda úıirli shegirtkeler, al 180 990 gektarda saıaq shegirtkelerdiń taralý qaýpi joǵary. Kóktemgi-jazǵy kezeńge arnalǵan tekserý kólemi 887 700 gektardy quraıdy.

- Shegirtkege qarsy hımııalyq óńdeý jumystary 153 963 gektar jerde júrgiziledi. Atap aıtqanda, respýblıkalyq bıýdjetten bólingen 257,2 mln teńge esebinen 83 389 gektarda úıirli shegirtkelerge qarsy sharalar atqarylady. Onyń ishinde ıtalıandyq prýsqa – 61 369 gektar, azııalyq shegirtkege – 22 020 gektar jer tıesili. Al jergilikti bıýdjetten bólingen 292,8 mln teńgege saıaq shegirtkelerge qarsy 70 574 gektar alqap óńdelmek, - delingen jergilikti ákimdik dereginde.

Hımııalyq óńdeý jumystaryn júrgizetin merdiger uıymdar anyqtalǵan. Áýe arqyly óńdeýdi AVIASILA jáne KazAvıatsııa júzege asyrady. Bul maqsatta 1 jeńil jáne 6 asa jeńil ushaq jumyldyrylady. Al jer ústi tásilimen óńdeý jumystaryn 7SU TRADE atqaryp, 30 birlik tehnıka paıdalanylady. Sonymen qatar 2 dron, Fıtosanıtarııa mekemesiniń 4 búrikkishi jáne ózge de arnaıy tehnıkalar tartylady.

Qazirgi ýaqytta 12 778 gektar jerde shegirtkeniń kúbirshikterine monıtorıng júrgizildi. Onyń ishinde ıtalıandyq prýs – 9 083 gektarda, azııalyq shegirtke – 2 070 gektarda, al saıaq shegirtke 1 625 gektarda anyqtalǵan.

- Naýqanǵa barlyǵy 156 adam qatysady. Sonymen qatar jergilikti ákimdikter men jumyspen qamtý ortalyqtary arqyly qosymsha 48 adam jumyldyrylmaq.

Shegirtkege qarsy hımııalyq óńdeý jumystary mamyr aıynyń alǵashqy onkúndiginde bastalady. Sondaı-aq Almaty qalasy jáne Jambyl, Qaraǵandy, Jetisý oblystarymen shekaralas aýmaqtarda birlesken monıtorıng júrgizý boıynsha kelisimder jasalǵan, - dep jazdy vedomstvodan.

Aıta keteıik, Atyraýda shegirtkege qarsy kúreske 250 mln teńge bólindi.