Almaty oblysynda 155 myń tonna ónim shyǵaratyn irimshik zaýyty salynady
ASTANA. KAZINFORM — Aýyl sharýashylyǵy mınıstri Aıdarbek Saparov pen ırandyq azyq-túlik holdınginiń prezıdenti Golam Alı Sýleımanı sútti tereń óńdeý salasyndaǵy iri jobany iske asyrýǵa arnalǵan ınvestıtsııalar týraly kelisimge qol qoıdy. Bul týraly vedomstvonyń baspasóz qyzmeti málim etti.
Bul Qazaqstan men Iran arasyndaǵy saýda-ekonomıkalyq yntymaqtastyqty damytý jolyndaǵy kezekti naqty qadam.
Sonymen qatar ótken jylǵy jeltoqsanda Qazaqstanǵa Iran Islam Respýblıkasynyń Prezıdenti sapary barysynda jasalǵan yntymaqtastyq jónindegi Ramalyq kelisim aıasyndaǵy ýaǵdalastyqtardyń jalǵasy sanalady.
— Jylyna 155 myń tonna ónimge josparlanǵan iri joba Almaty oblysynda salynady dep mejelenýde. Jalpy ınvestıtsııa kólemi 35,2 mlrd teńge. Qazirgi ýaqytta belgilengen aýmaqta qurylys-montaj jumystary júrgizilip jatyr, — dep habarlady mınıstrlikten.
Aıdarbek Saparov aýyl sharýashylyǵy ónimderin óńdeýge strategııalyq ınvestorlardy tartý memlekettik saıasattyń basym baǵyttarynyń biri ekenin atap ótti.
— Memleket basshysy AÓK salasynda óńdelgen ónim úlesin arttyrý jáne joǵary qosylǵan quny bar óndiristerdi qurý mindetin júktedi. Sút salasyn nyǵaıtýdyń múmkindigi zor. Byltyr Qazaqstanda irimshik pen súzbe óndirisiniń kólemi 13,1%-ǵa artty. Osy rette atalǵan jobanyń qolǵa alynýy eldegi qaıta óńdeý óndirisin edáýir arttyryp, otandyq sút óndirýshiler úshin kepildi ótkizý naryǵyn qalyptastyrýǵa jol ashady. Úkimet ekonomıkanyń basym sektorlarynda tıimdi jobalardy júzege asyratyn ınvestorlarǵa jan-jaqty qoldaý kórsetýge daıyn, — dedi mınıstr.
Golam Alı Sýleımanı Qazaqstannyń óńirlik azyq-túlik óndirisi ortalyǵy retindegi áleýetiniń myqty ekenin aıta kelip, kompanııanyń eldegi ınvestıtsııalyq qatysýdy odan ári keńeıtýge qyzyǵýshylyq bildirdi.
— Biz Qazaqstandy tek jeke jobalardy iske asyratyn alań retinde emes, uzaq merzimdi strategııalyq seriktes retinde qarastyramyz. Eldiń agrarlyq áleýeti joǵary, geografııalyq ornalasýy tıimdi jáne ınvestıtsııalyq klımaty qolaıly. Іrimshik zaýytyn salýmen qatar biz kartop óńdeý jáne balalar taǵamyn óndirý salalarynda jańa jobalardy iske asyrý múmkindigin qarastyryp otyrmyz, — dedi.
Investıtsııalyq kelisim aıasynda óndiristik alańǵa qajetti ınjenerlik ınfraqurylym júrgizýmen qatar, keń kólemde memlekettik jeńildikter qarastyrylǵan.
Zaýyttyń qurylysy 2029 jyly aıaqtalyp, paıdalanýǵa beriledi dep josparlanýda.
Qol qoıylǵan kelisimge sáıkes, ınvestor 400 turaqty jumys ornyn qurý, qazaqstandyq mamandardy daıarlaý men oqytý, sondaı-aq zamanaýı óndiristik quzyretter men tehnologııalardy qamtý sııaqty mańyzdy mindetterdi qamtamasyz etedi.
Sondaı-aq, 2028–2038 jyldar aralyǵynda kompanııa Almaty oblysyndaǵy jergilikti qaýymdastyqtardy qoldaý jáne áleýmettik bastamalardy júzege asyrýǵa jyl saıyn 50 mln teńge bólýdi josparlap otyr.
Bul Qazaqstannyń sút óńdeý salasyndaǵy eń iri jobalardyń biri. Ol shıkizat bazasynyń damýyna, otandyq sútke suranystyń artýyna, qazaqstandyq ónim túrleriniń keńeıýine jáne eldiń azyq-túlik qaýipsizdigin nyǵaıtýǵa yqpal etedi.
Aıta keteıik, jyl basynan 382,2 tonna irimshik pen súzbe eksporttaldy.
