Almaty oblysynda 150 myń gektar jer memleket menshigine qaıtaryldy

ASTANA. KAZINFORM — Qonaev qalasynda zańsyz berilgen jer ýchaskesi memleketke qaıtarylǵany belgili boldy. Bul týraly AShM baspasóz qyzmeti habarlady.

Aýyl sharýashylyǵy mınıstrliginiń Jer resýrstaryn basqarý komıtetiniń Almaty oblysy boıynsha Jer resýrstaryn basqarý departamenti Qonaev qalasy ákimdiginiń qyzmetine jospardan tys tekserý júrgizdi. Oǵan jer telimderin berýge qatysty máseleler negiz boldy.

— Tekserý barysynda jalpy aýmaǵy 150 myń gektar jer telimi turǵyn-oıyn-saýyq keshenin jáne zoologııalyq parkti ornalastyrýǵa berilgeni anyqtaldy. Alaıda jer berý kezinde Jer kodeksiniń talaptary buzylǵan. Atap aıtqanda, jer telimin bólý qala bas josparynyń erejelerine qaıshy kelgen, — delingen habarlamada.

Vedomstvo málim etkendeı, Qonaev qalasy ákimdigine berilgen nusqama belgilengen merzimde oryndalmaǵan.

— Osyǵan baılanysty prokýratýra Qonaev qalasynyń sotyna talap aryzben júgindi. Sot talqylaýy barysynda Jer resýrstaryn basqarý departamentiniń ókilderi úshinshi tarap retinde qatysyp, anyqtalǵan buzýshylyqtar boıynsha túsindirme berdi. Іsti qaraý qorytyndysy boıynsha sot talap aryzdy tolyq qanaǵattandyrdy. Sot sheshimimen kommertsııalyq maqsattaǵy jer ýchaskesi memleket menshigine qaıtaryldy, — dep túıindedi komıtet.

Budan buryn Shyǵys Qazaqstanda 120 myń gektar jer memleketke qaıtarylǵanyn jazdyq.