Almaty oblysynda 15 jastaǵy qyzdy zorlaý deregi boıynsha qylmystyq is qozǵaldy
QONAEV. KAZINFORM — Polıtsııa Almaty oblysy Raıymbek aýdanynyń Tegistik aýylynda 16 jasqa tolmaǵan adammen jynystyq qatynasqa túsý faktisi boıynsha qylmystyq is qozǵady. Bul týraly Almaty oblysynyń prokýratýrasy habarlady.
Buǵan deıin áleýmettik jeliler men BAQ-ta Almaty oblysynda segiz jigittiń eki aı boıy 15 jastaǵy oqýshy qyzdy zorlaǵany týraly aqparat taraǵan edi.
— Oblys prokýratýrasynyń bastamasymen qylmystyq isti tolyq, jan-jaqty jáne obektıvti tergeýdi qamtamasyz etý maqsatynda is Qonaev qalasynyń polıtsııa basqarmasyna tergeýge berildi. Arnaıy tergeý-jedel toby quryldy, — dep habarlady vedomstvo.
Jedel-izdestirý is-sharalary barysynda kúdiktiler anyqtalyp, olardyń ekeýi ustalyp, ýaqytsha ustaý ızolıatoryna qamaldy.
Endi qalǵan kúdiktiler boıynsha tergeý áreketteri júrgizilip jatyr.
— Tergeý barysy oblys prokýrorynyń erekshe baqylaýynda, — delingen habarlamada.
Eske salaıyq, buǵan deıin Pavlodarda aýyl turǵyny óz qyzyn zorlaǵany úshin 16 jylǵa sottalǵanyn jazǵanbyz.
