Almaty oblysynda 1462 jer ýchaskesi paıdalanylmaı jatyr
ALMATY. KAZINFORM – Almaty oblysynda byltyr óńirde paıdalanylmaı kelgen 1462 jer ýchaskege bólingen 422,0 myń gektar jer anyqtaldy.
Almaty oblysy ákimdiginiń málimetinshe, QR Aýyl sharýashylyǵy mınıstrligi jer resýrstaryn basqarý komıtetiniń tapsyrmasy boıynsha 2024 jyldyń sońyna deıin jalpy alańy 70 myń gektar paıdalanylmaı jatqan aýyl sharýashylyǵy jerlerin memleket menshigine qaıtarý kózdelgen.
– Aýyl sharýashylyǵy maqsatyndaǵy 89,7 myń gektar jer memleket menshigine qaıtaryldy. Jospar 128,0 paıyzǵa oryndaldy. Onyń ishinde 74,8 myń gektar jerdi menshik ıeleri óz erkimen bergeni olardyń zań talaptaryn saqtaýǵa jaýapkershiliginiń artqanyn kórsetedi. 14,9 myń gektar jer sot arqyly tárkilendi, – dep habarlady ákimdikten.
Almaty oblysynyń jer qatynastary basqarmasynyń basshysy Amanjol Ábdirahmanov bul jumystardy jalǵastyrýdyń mańyzdylyǵyn atap ótti.
– Árbir sotyq jerdi tıimdi paıdalaný – oblystyń, jalpy elimizdiń azyq-túlik qaýipsizdigine qosqan úlesi. Ár gektar qoǵamymyzǵa paıdasyn tıgizý úshin paıdalanylmaı jatqan ýchaskelerdi qaıtarý jumystaryn júıeli túrde jalǵastyramyz, – dedi ol.
Osyǵan deıin óńirde jalpy aýmaǵy 81,4 myń gektar jer memleket menshigine qaıtarylǵany týraly jazǵan edik.