Almaty oblysynda 1,3 trln teńge ınvestıtsııa tartylyp, 15 ındýstrıaldy aımaq qurylady

QONAEV. KAZINFORM — Almaty oblysynda ónerkásip óndirisi 108,7% ósim kórsetti, onyń 90%-y óńdeý sektorynda qalyptasqan. Bul rette shaǵyn jáne orta bıznestiń úlesi 46,3%-ǵa jetip otyr. Jańa derekterdi oblys ákimi Marat Sultanǵazıev baıandady.

Óńir basshysynyń aıtýynsha, bıylǵy 10 aıda ónerkásip kólemi 2,1 trln teńgege jetti. Oblys agrarlyq aımaqtan ınnovatsııalyq tehnologııalar men óńdeý ónerkásibiniń jetekshi ortalyǵyna aınala bastaǵan.

— Óńirlik ónimniń úshten biri ónerkásip salasyna tıesili bolǵandyqtan, bul sala ınvestıtsııa tartýdyń negizgi kózi bolyp esepteledi. 2022 jyly negizgi kapıtalǵa ınvestıtsııalar kólemi 614 mlrd teńge bolsa, 2024 jyly bul kórsetkish 1 trln teńgege deıin ósti. Jyl sońyna deıin 1,3 trln teńge kóleminde josparlanyp otyr, - dedi M.Sultanǵazıev Ortalyq kommýnıkatsııalar qyzmetinde ótken brıfıngide.

Іske qosylǵan iri jobalar ishinde «Focus Logistics» iri logıstıkalyq parki (70 mlrd teńge), «Altyn taǵa» beton ónimderi zaýyty (35 mlrd teńge), «LC Waikiki» kóterme-saýda ortalyǵy (30 mlrd teńge), «Shın-laın» balmuzdaq fabrıkasy (18 mlrd teńge), «Qapshaǵaı bıdaı ónimderi» dándi jáne maıly daqyldardy tereń óńdeıtin agrokesheni (12 mlrd teńge), «KegenMıasProm» et kombınaty (3,5 mlrd teńge) bar.

Tamaq ónerkásibi salasynda «Galanz Bottlers» kompanııasyn keńeıtý (17,8 mlrd teńge), «QAZAQ GLOBAL FOOD JV» (16,5 mlrd teńge), «Prıma Qus» (14 mlrd teńge) kompanııalary eksportqa baǵyttalǵan ónim óndiredi.

Jyl sońyna deıin «Kusto Logistics» kóterme-bólý ortalyǵy, «MP Solution» jáne «Eýrazııalyq logıstıkalyq park», «Imagine Apple Logistics» iri logıstıkalyq keshender men ındýstrııalyq parkter paıdalanýǵa beriledi.

Osyndaı kásiporyndardy ornalastyrý maqsatynda 15 ındýstrıaldy aımaq qurylyp jatyr (Talǵar aýdanynda «Qaırat-2», Eńbekshiqazaq aýdanynda —«Shelek», Jambyl aýdanynda — «Qazybek Bek», «Úlken», Uıǵyr aýdanynda — «Tasqarasý», «Suńqar», Qonaev qalasynda — «Qonaev», Alataý qalasynda — «Bereke» jáne jeteýi — Úlken Almaty aınalma jolynyń mańynda).

— Osylaısha, oblysymyzdyń ınvestıtsııalyq áleýetin arttyrý iri kásiporyndardyń ǵana emes, shaǵyn jáne orta bıznestiń de damýyna múmkindik berip jatyr. Búginde shaǵyn jáne orta bıznestiń jalpy óńirlik ónimdegi úlesi 46,3%-ǵa jetip, olardyń sany 156 myńnan asty, ósim kólemi 33,8% boldy, - dedi M.Sultanǵazıev.

Bul salada jumyspen qamtylǵan 740,3 myń halyqtyń úshten bir bóligi jumys isteıdi (273 myń adam).

Buǵan deıin ákim Almaty oblysynyń ekonomıkasy 6 trln teńgege deıin óskenin aıtqan edi.