Almaty oblysynda 12 jastaǵy qyzdy zorlady degen kúdikpen jasóspirim ustaldy

QONAEV. KAZINFORM – Áleýmettik jelilerde Almaty oblysynyń Yntymaq aýylynda 12 jastaǵy qyzdyń zorlanǵany týraly aqparat tarady. 

Oblystyq polıtsııa departamentiniń málimetinshe, atalǵan derek boıynsha qylmystyq is qozǵaldy.

– Kúdikti – kámeletke tolmaǵan jasóspirim ustalyp, ýaqytsha ustaý ızolıatoryna qamaldy. Sot sanktsııasymen oǵan bultartpaý sharasy retinde qamaýda ustaý túrindegi shara qoldanyldy. Qazirgi ýaqytta bolǵan oqıǵanyń barlyq mán-jaıyn jan-jaqty jáne obektıvti anyqtaýǵa baǵyttalǵan tergeý amaldary júrgizilip jatyr, - dep habarlady polıtsııa departamentiniń baspasóz qyzmeti.

Sonymen qatar kúdiktiniń zańdy ókilderi kámeletke tolmaǵan balany tárbıeleý mindetterin durys oryndamaǵany úshin ákimshilik jaýapkershilikke tartylǵan.

Polıtsııa atalǵan istiń tergeý barysy oblystyq departament basshylyǵynyń erekshe baqylaýynda ekenin atap ótti.

Eske salaıyq, buǵan deıin Almaty oblysynyń Qarǵaly aýylynda birneshe jasóspirim jetim qyzǵa zorlyq áreketterin jasap, ony vıdeoǵa túsirgenin habarlaǵanbyz. 

Bul derek boıynsha QR Qylmystyq kodeksiniń 124-babynyń 1-bóligi («On alty jasqa tolmaǵan adamǵa kúsh qoldanbaı azǵyndyq áreketter jasaý») boıynsha is qozǵaldy. Tergeý kezinde bul iske qatysy bar jeti jasóspirim anyqtaldy.