Almaty oblysynda 11 aıda 10,5 tonna esirtki tárkilendi

QONAEV. KAZINFORM — 2025 jyldyń 11 aıynda Almaty oblysy aýmaǵynda esirtkige qatysty 204 quqyqbuzýshylyq anyqtalǵan.

Oblystyq polıtsııa departamentiniń málimetinshe, bıyl 112 qylmys jáne 92 quqyqbuzýshylyq tirkelgen. Onyń ishinde: esirtkini satý jáne saqtaý, esirtki quramdas ósimdikterdi zańsyz ósirý, sondaı-aq tyıym salynǵan zattardy daıyndaý, óńdeý jáne nasıhattaý derekteri bar. Sotqa 108 qylmystyq is joldanǵan.

— Polıtsııa qyzmetkerleri zańsyz aınalymnan 10,5 tonnadan astam túrli esirtki zattaryn tárkiledi. Onyń ishinde sıntetıkalyq esirtkiler, marıhýana, gashısh, geroın, sondaı-aq jabaıy ósken qarasoranyń iri kólemderi bar. Sonymen qatar Jambyl jáne Talǵar aýdandarynyń aýmaǵynda sıntetıkalyq zattar óndirýmen aınalysqan eki esirtki zerthanasy joıyldy, — dep habarlady departamentten.

Odan bólek «Kıbernadzor» júıesiniń kómegimen esirtki saýdasy týraly aqparat taratqan 1 986 saıt jáne «Antıfrod-ortalyǵy» arqyly jalpy somasy 97,6 mıllıon teńgeden asatyn qarjylyq operatsııalar buǵattaldy.

Sondaı-aq óńirde esirtki quraldarynyń zańdy aınalymyn baqylaýǵa baǵyttalǵan «Darmek» jedel-profılaktıkalyq is-sharalary barysynda 41 quqyqbuzýshylyq anyqtalǵan.

Eske salaıyq, buǵan deıin Almaty áýejaıynda shetel azamaty 3 keli esirtkimen ustaldy.