Almaty oblysynda 10-nan astam eldi mekenge sý tasqyny qaýpi tónip tur
QONAEV. KAZINFORM – Almaty oblysynda eldi mekenderdi sý tasqyny men sý basýdan qorǵaý jumystary júrip jatyr.
Tótenshe jaǵdaılar departamentiniń málimetinshe, keıingi jyldary qaýip aımaǵyndaǵy aýyldardyń sany aıtarlyqtaı azaıǵan.
Oblystyq tótenshe jaǵdaılar departamentiniń birinshi orynbasary Rahman Kárimjannyń aıtýynsha, 2018 jyly sý tasqyny qaýpi bar aımaqta 60 eldi meken ornalasqan.
– 2018-2025 jyldar aralyǵynda ınjenerlik jáne uıymdastyrýshylyq sharalardyń nátıjesinde 47 eldi mekendegi qaýip azaıdy. Qalǵan 13 eldi mekende qaýip áli de bar, sý tasqynyna qarsy jumystar jalǵasyp jatyr, - dedi ol.
Bul 13 eldi mekende 11 myńnan astam úı bar, onda shamamen 34 myń adam turady.
Jalpy Almaty oblysynda erigen qar jáne tasqyn sýdan zardap shegýi múmkin 60 eldi meken toǵyz aýdanda ornalasqan:
• Balqash aýdany – 11 eldi meken;
• Eńbekshiqazaq aýdany – 16;
• Jambyl aýdany – 3;
• Іle aýdany – 3;
• Qarasaı aýdany –11;
• Talǵar aýdany – 9;
• Uıǵyr aýdany – 2;
• Raıymbek aýdany – 2;
• Kegen aýdany – 3.
Departament málimetinshe, sý tasqynyna kóbine jerasty sýlarynyń kóterilýi, qar men jańbyr sýlarynyń ózen arnasynan asýy jáne gıdrotehnıkalyq qurylystardyń tozýy nemese búlinýi sebep bolady.
Injenerlik jáne aldyn alý sharalary
2026 jylǵy kóktemgi sý tasqyny kezeńine daıyndyq aldyn ala bastaldy. Qańtar aıynan bastap aýqymdy profılaktıkalyq jumystar júrgizildi.
– Jyl basynan beri 45 shaqyrymnan astam aryq, 31 shaqyrym kanal, 4 shaqyrymǵa jýyq ózen arnasy, sondaı-aq avtomobıl jáne temirjol astyndaǵy 21 sý ótkizý qubyry tazartyldy, - dedi Rahman Kárimjan.
2025 jylǵa arnalǵan jospar boıynsha alty negizgi ınjenerlik shara qarastyrylǵan. Onyń ekeýi iske asyryldy: Uıǵyr aýdanynda Úlken Aqsý sý qoımasynyń bógeti kúsheıtildi, al Raıymbek aýdanynda Baıankól ózenindegi kópirdiń kúrdeli jóndeýi aıaqtaldy, oǵan 354 mln teńge bólingen.
Qalǵan tórt nysan boıynsha qujattar 2026 jylǵy naýryzǵa deıin daıyndalyp, sodan keıin bıýdjetke ótinish beriledi:
• Eńbekshiqazaq aýdanynda Esik ózeniniń arnasyn turaqtandyrý jobasy;
• Eńbekshiqazaq aýdanyndaǵy Teskensý jáne Báıdibek bı aýyldarynda jerasty sýyn tómendetý;
• Kegen aýdanyndaǵy Saty aýylynda baýraıdan aǵatyn sýdy burýǵa arnalǵan bóget kanalynyń qurylysy.
Uıǵyr aýdanynda Sharyn ózeninde qorǵanysh bógeti salyndy. Bul jumysqa jedel shyǵyndar qorynan 8 mln teńge bólindi.
Sonymen qatar «Oktıabr-1» sý qoımasynyń jobasy túzetilip, «K-25» sý qoımasynda kúrdeli jóndeý júrip jatyr. Balqash aýdanyndaǵy Іle ózeniniń arnasynda iri jumystarǵa daıyndyq bastaldy.
Almaty oblysynda barlyǵy 317 gıdrotehnıkalyq nysan bar.
– 2026 jyly qaýipsizdikti arttyrý úshin Jambyl jáne Eńbekshiqazaq aýdandaryndaǵy kommýnaldyq menshiktegi alty sý qoımasyna kópfaktorly tekserý júrgizý josparlanyp otyr, - dedi vedomstvo ókili.
Sý tasqyny ahýalyn baqylaý
Departament málimetinshe, qazirgi ýaqytta oblystaǵy sý tasqyny qaýpi turaqty. Jaǵdaıdy baqylaýǵa 42 gıdrobeket tartylǵan.
– Ózenderinde muz keptelisi tirkelgen joq, sý aǵysy qalypty. Jedel monıtorıng úshin «Tasqyn» aqparattyq júıesi qoldanylady, onyń derekteri bir mezgilde aýmaqtyq bólimshelerge jiberilip otyrady, - dedi Rahman Kárimjan.
Іri sý qoımalaryndaǵy sý deńgeıi de turaqty baqylaýda.
Tótenshe jaǵdaılar departamentiniń málimetinshe, tek ınfraqurylymdy kúsheıtý jetkiliksiz. Ár turǵyn sý tasqyny qaýpi týyndaǵanda qalaı áreket etý keregin bilýge tıis. Osy maqsatta 2025-2026 jyldary 45 reıd ótkizilip, 38 eldi meken qamtyldy. Turǵyndarmen 80 kezdesý ótip, oǵan 760-tan astam adam qatysty.
Buǵan deıin Pavlodar, Batys Qazaqstan jáne Aqtóbe oblystarynda, sonymen birge Astanada sý tasqynyna daıyndyq qalaı júrip jatqany týraly jazǵan edik.