Almaty oblysynan Batys Qazaqstan oblysyna 130 tonna gýmanıtarlyq kómek jóneltildi
QONAEV. KAZINFORM - Almaty oblysynan Batys Qazaqstan oblysyna jalpy kólemi 130 tonna gýmanıtarlyq kómek jóneltildi.
Almaty oblysy ákimdiginiń málimetinshe gýmanıtarlyq kómektiń 100 tonnasy temir jol arqyly, 30 tonnasy «Altyn orda» saýda bazary uıymdastyrǵan júk kóligimen jóneltildi.
Sondaı-aq, oblys kásipkerleriniń qoldaýymen arnaıy qorǵa 30 mln teńge qarjylaı kómek aýdaryldy.
«Búgin sý tasqyny bolǵan aımaqtarǵa kómek kórsetý maqsatynda oblystan 15 volonter attanatyn bolady. Gýmanıtarlyq kómekti jınaýǵa oblystyń 9 aýdany, 1 qalasy, kásipkerler, etnomádenı birlestikterdiń ókilderi, «AMANAT» partııasynyń músheleri, Qazaqstan Musylmandary dinı basqarmasynyń oblystyq fılıaly men qaıyrymdy jandar óz úlesin qosty», - dep habarlady Almaty oblysy ákimdiginiń baspasóz qyzmeti.
Gýmanıtarlyq kómekti jınaqtaý úshin qurylǵan «Kúshimiz-birlikte» volonterlar shtabynyń jumysyn uıymdastyrýǵa kásipkerlik, jumyldyrý daıyndyǵy, ishki saıasat basqarmalary, baspasóz qyzmeti, Qonaev qalasynyń ákimdigi qoldaý kórsetti. Shtab jumysyna 300 den astam volonter qatysty.
Eske salsaq, buǵan deıin almatylyqtar Atyraý oblysyna gýmanıtarlyq kómek jibergen bolatyn.
