Almaty oblysyna sheteldik ınvestıtsııa aǵyny qanshalyqty azaıdy
QONAEV. KAZINFORM — 2024 jyldyń 9 aıynda Almaty oblysyna tartylǵan tikeleı sheteldik ınvestıtsııanyń jalpy somasy — 191,1 mln dollar boldy. Bul josparlanǵan kórsetkishten 335,9 mln dollarǵa az.
Almaty oblysynyń kásipkerlik jáne ındýstrııalyq-ınnovatsııalyq damý basqarmasynyń basshysy Qýanysh Baqytulynyń aıtýynsha, 2023 jyldyń qorytyndysy boıynsha oblysqa tikeleı sheteldik ınvestıtsııanyń jalpy aǵyny 880,2 mln AQSh dollarynan asyp ketti. Bul 2022 jylǵy kórsetkishten (686,6 mıllıon dollar) 128,2 paıyzǵa joǵary.
— 2024 jylǵa arnalǵan josparda 527 mln dollar kóleminde shetel ınvestıtsııasyn tartý kózdelgen. 2024 jyldyń úshinshi toqsanynda naqty túsimder 191,1 mln dollar boldy. Bul josparlanǵannan 335,9 mln dollarǵa az. 2024 jyldyń tórtinshi toqsanynda aldyn ala málimetter boıynsha sheteldik ınvestıtsııanyń jalpy aǵyny 350 mln AQSh dollarǵa jetedi dep kútilýde. Osylaısha, 2024 jyldyń sońyna qaraı oblysqa tartylǵan tikeleı sheteldik ınvestıtsııa kólemi 541,1 mln AQSh dollary deńgeıinde bolýy kerek. Degenmen, 2024 jyldyń derekteri 2025 jyldyń ekinshi toqsanynda ǵana jarııalanady, — dep jaýap berdi Qýanysh Baqytuly Kazinform agenttiginiń saýalyna.
Spıkerdiń sózinshe, sheteldik ınvestıtsııa aǵynynyń negizgi kólemi ǵımarattardy paıdalanýǵa berý aktisin alyp, ony iske qosqannan keıin ǵana qural-jabdyqqa salynǵan ınvestıtsııanyń tolyq kólemi tirkeldi.
— 2024 jyldyń tórtinshi toqsanynda birneshe iri nysanyń qurylysy aıaqtaldy. Atap aıtqanda, qytaılyq Jiangxi Copper kompanııasy volfram kenin óndirý jáne óńdeý zaýytynyń qurylysyn aıaqtady. Tartylǵan ınvestıtsııa kólemi — 290 mln dollar. Sondaı-aq ońtústikkoreıalyq «KT& G» kompanııasy 204 mln dollarǵa temeki shyǵaratyn nysan saldy. Al, «Focus Logistics» reseılik «OZON» kompanııasymen birlesip, 151 mln dollarǵa «A» klasyndaǵy qoımalar salý jobasyn qolǵa aldy, — dedi ol.
Basqarma basshysy, 2024 jyldyń qorytyndysy boıynsha negizgi kapıtalǵa salynǵan ınvestıtsııa kólemi 980,8 mlrd teńgege jetkenin atap ótti.
Naqty kólem ındeksi (NKI) 130,0 paıyzdy kórsetip, Almaty oblysy elimiz boıynsha besinshi orynǵa shyqty. Bul josparlanǵan kórsetkishtiń 96 paıyzy. Ótken jylmen salystyrǵanda 243,1 mlrd teńgege kóp.
— 2025 jyly 359,2 mlrd teńgege 28 jobany júzege asyrý josparda bar. Bul 4300-den astam jańa jumys ornyn qurýǵa múmkindik beredi, — dep qosty Qýanysh Baqytuly.
Aıta keteıik, 28 qańtar kúni Memleket basshysynyń tóraǵalyǵymen ótken úkimettiń keńeıtilgen otyrysynda Qasym-Jomart Toqaev úkimet ınvestıtsııa salasyndaǵy jumysty kúsheıtýi qajet ekendigine basa nazar aýdarǵan bolatyn.
Ulttyq banktiń málimetinshe, byltyr Qazaqstanǵa tartylatyn tikeleı sheteldik ınvestıtsııa 30 esege qysqardy.
Keıin Premer-mınıstr Oljas Bektenov elimiz úshin mańyzdy jobalardy iske asyrýǵa jeke ınvestıtsııalar tartý jónindegi jumysty kúsheıtýdi tapsyrdy.
Sondaı-aq Syrtqy ister mınıstrligi Investıtsııa komıtetiniń tóraǵasy Ǵabıdolla Ospanqulov keıingi jyldary Qazaqstanǵa ınvestıtsııa salyp jatqan elderdiń alǵashqy kóshi qaı memleketter bastap turǵanyn aıtty.