Almaty oblysynda erli-zaıypty uıymdastyrǵan esirtki zerthanasy joıyldy

ALMATY OBLYSY. KAZINFORM. Polıtseıler Almaty oblysynyń Kaztsık aýylynda sıntetıkalyq esirtki óndiretin iri zerthanany joıdy, – dep habarlaıdy Polisia.kz.

Esirtki óndirisin Almatydan kelgen otbasylyq jup uıymdastyrǵan. Bul úshin olar úı satyp alyp, onyń janyna zerthanaǵa laıyqtap úı-jaı salǵan.

Zerthanadan hımııalyq reaktsııalarǵa arnalǵan agregattar, esirtkini keptiretin oryndar tabyldy.

– Otbasylyq juptyń qylmystyq áreketteriniń dáleli retinde polıtseıler eki zerthanalyq reaktor, 100 kg sıntezdelgen esirtkilik untaq tárizdes zat jáne esirtkini óndirýge arnalǵan 800 lıtrden astam prekýrsor tárkilendi. Osylaısha, tártip saqshylary quny 7 mlrd teńge bolatyn sıntetıkalyq esirtkiniń 550 myńǵa jýyq dozasynyń taralýynyń aldyn aldy. Top bolyp asa iri kólemde esirtki óndirgeni úshin ustalǵandar múlki tárkilenip, 10 jyldan 15 jylǵa deıin bas bostandyǵynan aıyrylýy múmkin, – dedi QR ІІM esirtki qylmysyna qarsy is-qımyl departamenti bastyǵynyń orynbasary Baqytjan Ámirhanov.

Aıta ketý kerek, 2023 jyldyń jeltoqsan aıynan ІІM-niń bastamasymen sıntetıkalyq esirtkini óndirý úshin qoldanylatyn qural-jabdyqtyń aınalymyna qylmystyq jaýapkershilik engizildi. Bul úshin 3 jyldan 15 jylǵa deıin bas bostandyǵynan aıyrý jazasy qarastyrylady.