Almaty oblysyna Danııadan 1 myńǵa jýyq Golshtın-Frız sıyrlary jetkizildi
ASTANA. KAZINFORM — Birinshi ret shetelden aımaqqa áýe kóligi arqyly 956 joǵary ónimdi «Golshtın-Frız» jáne «Djersı» iri qara mal jetkizildi.
Býaz sıyrlar Almaty halyqaralyq áýejaıy arqyly jetkizilip, Talǵar aýdanyndaǵy «Almatınskıı plemennoı zavod» óndiristik kooperatıviniń bazasyna ornalastyryldy. Bul sharýashylyq birneshe jyl boıy sútti mal sharýashylyǵyn damytý jáne sút óndirisin ulǵaıtý baǵytynda júıeli jáne josparly jumys júrgizip keledi.
Qazir kooperatıvte 2 593 asyl tuqymdy iri qara mal bar. 2025 jyldyń 11 aıynyń qorytyndysy boıynsha kásiporynda 7 420 tonna sút óndirildi, al bir sıyrǵa shaqqandaǵy ortasha ónimdilik 4 230 keli boldy, bul kórsetkish maldardy ustaý jáne azyqtandyrýda qoldanylatyn tehnologııalardyń tıimdiligin dáleldeıdi.
2025 jyly Soltústik Qazaqstan oblysynyń tájirıbesin taratý baǵdarlamasy aıasynda kooperatıv 3,5 mlrd teńge mólsherinde jeńildikpen nesıe aldy, bul saýdaǵa arnalǵan sút fermerlik sharýashylyǵyn keńeıtý boıynsha aýqymdy ınvestıtsııalyq jobany júzege asyrýǵa múmkindik berdi.
Aǵymdaǵy jyldyń jeltoqsanynda joba aıasynda Reseı Federatsııasynan 443 iri qara mal jetkizildi, onyń ishinde 152 «Golshtın-Frız» asyl tuqymdy sıyr jáne 291 «Djersı» sıyry bar. Sonymen qatar, Danııa Koroldiginen qosymsha 513 asyl tuqymdy iri qara jetkizildi, onyń ishinde 161 «Djersı» jáne 352 «Golshtın-Frız» tuqymdary bar.
— Jobany tolyq júzege asyrý Talǵar aýdanynda sút óndirisin eki ese arttyrýǵa, al Almaty oblysy boıynsha sút ónimderiniń óndirisi men jetkizilimin 20%-ǵa ulǵaıtýǵa múmkindik beredi. Bolashaqta «Almatınskıı plemennoı zavod» shetelden satyp alynatyn asyl tuqymdy buzaýlardyń jalpy sanyn 2 000-ǵa jetkizýdi josparlap otyr, — delingen habarlamada.
Taǵy da josparlanyp otyrǵan birneshe partııa asyl tuqymdy iri qara mal óńirde sútti mal sharýashylyǵyn turaqty damytýǵa múmkindik beredi.
Budan buryn Qazaqstanda sıyr tuqymyn embrıon deńgeıinde asyldandyratyn zerthana ashylýy múmkin ekenin jazǵan edik.