Almaty oblysy jumyspen qamtýdy úılestirý basqarmasynyń basshysy aýysty

ASTANA. KAZINFORM — Asyl Vaısov Almaty oblysynyń jumyspen qamtýdy úılestirý jáne áleýmettik baǵdarlamalar basqarmasyna jetekshilik etedi, dep habarlaıdy oblys ákimdiginiń baspasóz qyzmeti.

— Almaty oblysy ákiminiń mindetin atqarýshynyń ókimimen Asyl Nuralyuly Vaısov 2026 jylǵy 19 qańtardan bastap Almaty oblysynyń jumyspen qamtýdy úılestirý jáne áleýmettik baǵdarlamalar basqarmasynyń basshysy laýazymyna taǵaıyndaldy, — delingen habarlamada.

Asyl Nuralyuly 1979 jyly týylǵan, bilimi joǵary, 2001 jyly Qazaqtyń memlekettik agrarlyq ýnıversıtetin «býhgalterlik esep jáne aýdıt» mamandyǵy, 2005 jyly Ortalyq Azııa Ýnıversıtetin «quqyqtaný» mamandyǵy boıynsha bitirip, 2023 jyly Qazaq ulttyq agrarlyq zertteý ýnıversıtetinde «iskerlik ákimshilik júrgizý» mamandyǵy boıynsha magıstr dárejesin alǵan.

Eńbek jolyn 2002 jyly Qarjy polıtsııa organynyń qyzmetkeri bolyp bastaǵan.

Ár jyldary «Ros Kaz Sekıýrıtı» JShS dırektorynyń orynbasary, dırektory, «Arlan GROUP Sekıýrıtı» JShS-nyń dırektory, Talǵar aýdany kásipkerlik bóliminiń bas mamany, Panfılov aýyldyq okrýginiń ákimi, Eńbekshiqazaq aýdany ákiminiń orynbasary laýazymdaryn atqarǵan.

2022 jyldyń tamyz aıynan bastap Almaty oblysynyń memlekettik satyp alý basqarmasynyń basshysy laýazymynda qyzmet etti.

Budan buryn Qazaqstanda ótken apta ishinde bolǵan kadrlyq taǵaıyndaýlarǵa sholý jasaǵan edik.