Qyzylordada Quryltaı saılaýynda múgedektigi bar jandarǵa qandaı jaǵdaı qarastyrylǵan
QYZYLORDA. KAZINFORM – Qyzylorda oblysynda múgedektigi bar azamattardyń 23 tamyz kúni ótetin Quryltaı saılaýyna qatysýy úshin qolaıly jaǵdaı jasalǵan.
Búginde óńirde osy sanattaǵy 21431 adam saılaýǵa qatysýǵa quqyly.
- Biz jergilikti ákimdikpen birlesip saılaýshylardyń daýys berýin kedergisiz uıymdastyrýdy kózdeımiz. Árbir ýchaskeniń múgedektigi bar saılaýshy úshin qolaıly ári qaýipsiz bolýyna basa mán beremiz. Sebebi árbir daýys mańyzdy jáne azamattardyń erkin tańdaý jasaý quqyǵyn qamtamasyz etýge mindettimiz. Óńirde kórý qabileti buzylǵan 5 928, estý qabileti buzylǵan 1 339, kreslo-arbamen qozǵalatyn 2 376 saılaýshy bar. Respýblıkalyq qoljetimdiliktiń ınteraktıvti kartasyna 386 saılaý ýchaskesiniń 359-y týraly málimet engen. Qalǵany - azamattardyń ýaqytsha bolý ýchaskeleri, ıaǵnı jabyq ýchaskeler, - dedi Qyzylorda oblysynyń aýmaqtyq saılaý komıssııasynyń múshesi Baqytjan Іdirisov.
Daýys berý kúni múgedektigi bar saılaýshylardy saılaý ýchaskelerine jetkizý úshin 67 ınvataksı tartylmaq. Onyń 11-i kreslo-arbamen qozǵalatyn adamdardy tasymaldaýǵa beıimdelgen. Osy kúni 45 sýrdoaýdarmashy ymdaý tili qyzmetin onlaın túrde kórsetedi.
4 tamyzdan bastap aýmaqtyq saılaý komıssııalary úkimettik emes uıymdardyń ókilderimen birge saılaý ýchaskeleriniń múgedektigi bar saılaýshylar úshin qoljetimdiligin baǵalaý maqsatynda monıtorıng júrgizedi.
Eske salaıyq, QR Ortalyq saılaý komıssııasy ázirlegen biryńǵaı úlgidegi aqparattyq bannerler Qyzylorda qalasy men aýdandardaǵy ortalyq kóshelerge, halyq kóp shoǵyrlanatyn oryndarǵa ornalastyryla bastady.
