Almaty oblysy: sot úıin buzý týraly zańsyz qaýly shyǵarǵan turǵynnyń quqyǵy qorǵaldy
ASTANA. KAZINFORM - Almaty oblysynyń turǵyny memlekettik organdardan satyp alynǵan jer teliminiń jáne salynǵan turǵyn úı qurylysynyń naryqtyq qunyn joǵaltý túrindegi 11 mıllıon teńge shyǵyndy óndirý týraly talap qoıýmen sotqa júgindi.
2009 jyly talap qoıýshy menshik ıesinen (satýshydan) 2007 jylǵy zańdastyrý komıssııasynyń sheshimimen jáne 2008 jylǵy jeke menshikke quqyq beretin aktimen ózine tıesili ýchaskeni satyp alǵan.
Talap qoıýshy sol jerge turǵyn úı salyp, 2015 jyly aýdandyq komıssııanyń sheshimimen zańdastyrǵan.
Bir jyldan keıin sot (úshinshi tulǵanyń talap qoıýy boıynsha) zańdastyrý týraly sheshimdi, jeke menshik quqyǵyna aktini, ýchaskeni satyp alý-satý shartyn, al taǵy 2 jyldan keıin úıdi zańdastyrý týraly sheshimdi jaramsyz dep tanyp, ǵımaratty buzýǵa qaýly shyǵarǵan.
Sarapshynyń qorytyndysy boıynsha turǵyn úıdi qalpyna keltirý quny 11 mıllıon teńgeni quraıdy.
Birinshi satydaǵy sot satýshydan 1 mıllıon teńgege jýyq, aýdan ákimi apparatynan 11 mıllıon teńgege jýyq shyǵyndy ishinara óndirgen.
Apellıatsııa talap qoıýshynyń ózi turǵyzǵan, eshkim buzbaǵan, paıdalanylǵan kúıinde turǵan turǵyn úı qurylysynyń bolýyna baılanysty talap qoıýdy qanaǵattandyrýdan bas tartqan.
Joǵarǵy Sottyń azamattyq ister jónindegi sot alqasy isti qaraı otyryp, mynany kórsetti:
-talap qoıýshynyń sot aktilerine sáıkes qosalqy qurylystary bar turǵyn úı salý quqyǵynyń toqtatylýyna baılanysty zalal keltirý týraly dálelderi teriske shyǵarylmaǵan;
- talap qoıýshy ýchaskege jáne qosalqy qurylystary bar úı qurylysyna menshik quqyǵynan aıyrylýyna baılanysty naqty shyǵynǵa ushyraǵan (basqa úı ǵımaratyn satyp alý nemese materıaldardy tóleý jáne jańasyn salý shyǵyndary);
- 11 mln. teńge somasyndaǵy turǵyn úı qurylysynyń ornyn toltyrý quny sarapshylyq qorytyndy boıynsha eń az jáne sońǵy 2 jylda jyljymaıtyn múlik qunynyń ósýine baılanysty naryqtyq qunǵa sáıkes kelmeıdi;
- satýshy sot sheshimin áli oryndamaǵan, óndirilgen 1 mıllıon teńgege jýyq aqsha tólenbegen, talap qoıýshynyń quqyǵy qalpyna keltirilmegen;
- búkil úıdi satý týraly qorytyndy talap qoıýdan bas tartý úshin negizsiz, óıtkeni kórshi 1 mıllıon teńgege qurylys materıaldary men qorshaý satyp alǵan;
- alynǵan soma 11 mıllıon teńge shyǵyndy ótemeıdi, qalǵan 10 mıllıon teńge aıyrmany eshkim ótemegen.
Joǵarǵy sot apellıatsııanyń qaýlysyn ózgertti: keltirilgen shyǵyn úshin 10 mıllıon teńge talap qoıýshynyń paıdasyna ákimdikten óndirildi.
