Almaty oblysy oblıgatsııa arqyly mıllıardtar tartyp jatyr: ákimdik ne úshin qaryz aldy

Almaty oblystyq ákimdigi 12,5 mıllıard teńgeni 15,28% jyldyq paıyzben 46 aıǵa alýǵa nıetti. 

Ol jylý, elektr, sýmen jabdyqtaý jáne kanalızatsııa jelileri men júıelerin kúrdeli jóndeý úshin shyǵarylǵan kórinedi.

Bul – oblystyń bıyldyqqa 6 ret jarııalaǵan baǵaly qaǵazy eken.

Almaty oblystyq ákimdiginiń Kazinform tilshisine bergen jaýabynda oblys 2026 jyly 9 mıllıard 71 mıllıon teńge qaryz alǵanyn málimdedi.

• 30 maýsymda shyǵarylym kólemi – 4,25%-ben 2 mıllıard teńge.
Bul kezekte turǵan azamattardy áleýmettik turǵyn úımen qamtamasyz etý úshin shyǵaryldy.
• 17 shilde – 15,1%-ben 3,5 mıllıard teńge.
Ol da kezekte turǵan azamattardy áleýmettik turǵyn úımen qamtamasyz etý maqsatynda jalǵa beriletin turǵyn úı satyp alýǵa baǵyttaldy.
• 7 tamyzda eki ret baǵaly qaǵaz shyǵaryldy. Bireýi 1,5 mıllıard teńge, ekinshisi – 502 mıllıon 813 myń teńge. Ekeýi de 14,31%-ben sýmen jabdyqtaý jáne káriz júıelerin qaıta qurýǵa jumsalady.
• 14 tamyz – 4,25% mólsherlememen 1,5 mıllıard teńge.
Ol kezekte turǵan azamattardy áleýmettik turǵyn úımen qamtmamasyz etý maqsatynda nesıelik turǵyn úı satyp alýǵa bólindi.

Ákimdik ne úshin oblıgatsııa shyǵarady?

Oblıgatsııa – qaryz alý quraly. Ákimdik aqsha kerek bolǵan kezde KASE-ge oblıgatsııalyq qaǵaz ornalastyrady. Onyń maqsaty men talaptaryn kórip, ınvestorlardyń biri aqsha berýge kelisedi. Ákimdik belgili bir ýaqyttan keıin aqshasyn qaıtarýǵa jáne qaryzdy paıdalanǵany úshin paıyz tóleýge mindetti bolady.

Qarjy mınıstrligi ákimdikter ne sebepti bıýdjetten suratýdyń ornyna oblıgatsııany tańdaıtynyn jáne qaryzdyq paıyz mólsheri nege ártúrli bolatynyn túsindirip berdi. 

Jergilikti atqarýshy organdar mýnıtsıpaldyq oblıgatsııalar shyǵarý arqyly bıýdjet tapshylyǵyn jaýyp, memlekettik jáne úkimettik baǵdarlamalardy iske asyra alady.

- Qarjyny mundaı jolmen tartý respýblıkalyq bıýdjetten jergilikti bıýdjetke suraý jibergenge qaraǵanda áldeqaıda yńǵaıly ári ońaı. Al Ulttyq qordan beriletin transfertter respýblıkalyq bıýdjetke túsedi, ıaǵnı jergilikti bıýdjetke tikeleı berilmeıdi. Respýblıkalyq bıýdjetten qarjy tartý protsesiniń qatań retteletinin eskersek, jergilikti bıýdjette qarajat jetispegen jaǵdaıda oblıgatsııa shyǵarý tıimdi balamalardyń biri sanalady, - delingen habarlamada.

Ákimdikter bir jylda tarta alatyn qaryzdyń shekti kólemi bar. Ol bıýdjet atqarý jónindegi ýákiletti organmen kelisip belgilenedi. Qaryz oblystyń jyldyq kiristeriniń 10 %-nan aspaýǵa tıis.

Nege paıyz mólsherlemesi ártúrli?

Almaty oblysynyń keı qaryzdary 4,25%-ben, al keıbiri 15%-dan joǵary etip berilgen.

Qarjy mınıstrliginiń málimdeýinshe, turǵyn úı salýǵa beriletin qaryzdardyń paıyzy azyraq bolady. Sebebi mundaı oblıgatsııalardy negizinen «Qazaqstandyq turǵyn úı kompanııasy» satyp alady. Bul jaǵdaıda syıaqy mólsherlemesi jyldyq 0,35% jáne 4,25% deńgeıinde belgilenedi.

Al jol salý, t.b. jóndeý jumystaryna kommertsııalyq uıymdar aqsha beredi. Ondaıda memlekettik baǵaly qaǵazdardy naryqtyq sharttarmen shyǵarady.