Almaty oblysy bóliginde Rysqulov dańǵylyn uzartýǵa 3 mlrd bólinedi
ALMATY. KAZINFORM — Almatyda Rysqulov dańǵylyn uzartý jumystary jalǵasady.
Qazir Rysqulov dańǵylyn Farıza Ońǵarysynova kóshesinen qala shekarasyna deıin uzartý jumystary aıaqtalýǵa jaqyn. Joldyń jańa bóliginde qyrkúıek aıynan beri kólik qozǵalys ashylǵan.
Degenmen, qala ákimdigi bul jumystarmen toqtamaq emes. Qalalyq bıýdjet esebinen Almaty oblysy bóligindegi kóshe uzartý jumystary qarjylandyrylady. Aldaǵy ýaqytta Rysqulov dańǵylyn Úlken Almaty avtomobıl aınalma jolyna jalǵaý josparlanǵan. Tıisti lot memlekettik satyp alý portalynda jarııalandy. «Almaty oblysy Qarasaı aýdanynda Rysqulov jolyn salý» jobasyna 3 225 978 190 teńge bólingen. Tapsyrys berýshi — Almaty qalasy Jol ınfraqurylymyn damytý basqarmasy. Merdigerler ótinimi 16 qazannan bastap 21 qazanǵa deıin qabyldanady.
Jalpy aldaǵy jyldary Almatyda Rysqulov dańǵylynan bólek Tilendıev, Soltústik aınalma, Saın kóshelerin, sondaı-aq Abaı dańǵylyn ÚAAAJ-ǵa deıin uzartý kózdelip otyr.
Qalanyń jol-kólik júıesi úshin mańyzdy jobalardyń biri — Alataý dańǵyly Beljaılaý kóshesinen Jandosov kóshesine deıin uzartý. Búginde onyń jobalaý-smetalyq qujattamasyn ázirleý jumystary bastalǵan.
Al qalanyń shyǵys bóliginde Sátbaev kóshesi Lýganskıı kóshesinen Shyǵys aınalma jolyna deıin uzartylady.
