Almaty oblysy bilim basqarmasynyń basshysy aýysty
ASTANA. KAZINFORM — Almaty oblysy ákiminiń m.a. ókimimen Araılym Aqsýbaıqyzy Tóleýbekova 2025 jylǵy 21 tamyzynan bastap Almaty oblysy bilim basqarmasynyń basshysy laýazymyna taǵaıyndaldy, dep habarlaıdy oblys ákimdigi.
Araılym Aqsýbaıqyzy 1977 jyly týǵan.
2004 jyly Abaı atyndaǵy Qazaq ulttyq pedagogıkalyq ýnıversıtetin «basqa ult mektepterindegi qazaq tili men ádebıeti» mamandyǵy, 2015 jyly Almaty Ýnıversıtetin «quqyqtaný» mamandyǵy, 2020 jyly Aımaqtyq áleýmettik-ınnovatsııalyq ýnıversıtetin «orys tili men ádebıeti» mamandyǵy boıynsha bitirgen.
2017 jyly Aımaqtyq áleýmettik-ınnovatsııalyq ýnıversıtetinde «quqyqtaný» mamandyǵy boıynsha magıstr dárejesin alǵan.
Eńbek jolyn 2001 jyly Іle aýdany Rahat aýylynyń №20 orta mektebiniń qazaq tili men ádebıeti pániniń muǵalimi bolyp bastaǵan.
Ár jyldary Іle aýdany Rahat aýylynyń №20 orta mektebi dırektorynyń oqý-tárbıe isi jónindegi orynbasary, №97617 áskerı bóliminiń operatory, Іle aýdanynyń bilim jáne sport bóliminiń jetekshi mamany, Іle aýdany №4 orta mektebi dırektorynyń oqý-tárbıe isi jónindegi orynbasary, Energetıcheskıı aýyldyq okrýgi ákimi apparatynyń jetekshi mamany, Іle aýdany №29 orta mektebi dırektorynyń oqý-tárbıe isi jónindegi orynbasary, «Balaýsa» balabaqshasynyń ádiskeri, Іle aýdanynyń bilim bóliminiń ortalyqtandyrylǵan býhgalterliginiń zańgeri, bas mamany, bólim basshysy, Almaty oblysy bilim basqarmasynyń Qonaev qalasy boıynsha bilim bóliminiń basshysy, Eńbekshiqazaq aýdany boıynsha bilim bóliminiń basshysy laýazymdaryn atqarǵan.
2025 jyldyń maýsym aıynan bastap Almaty oblysy bilim basqarmasynyń Іle aýdany boıynsha bilim bóliminiń basshysy laýazymynda qyzmet etti.
Eske salsaq, Almatydaǵy balalar úıinen tárbıelenýshilerdi Qonaevqa kóshirý kezinde týyndaǵan daýǵa baılanysty Almaty oblysy ákiminiń orynbasary jáne eki basqarmanyń basshysy qyzmetinen bosatyldy. Olardyń arasynda bilim basqarmasynyń basshysy Saltanat Bespaeva bar.
Budan buryn Qaraǵandy oblysynyń Bilim basqarmasyn Dýlat Shaıkenuly Jekebaev basqaratynyn habarlaǵan edik.