Almaty oblysy asyltuqymdy mal sharýashylyǵyn damytýǵa bólingen qarjy jymqyrylǵan
ASTANA. KAZINFORM - Qarjylyq monıtorıng agenttigi asyltuqymdy mal sharýashylyǵyn damytýǵa bólingen memleket qarjysyn jymqyrý jáne zańdastyrý deregin anyqtady.
Agenttiktiń baspasóz qyzmetiniń habarlaýynsha, júrgizilgen sotqa deıingi tergep-tekserý aıasynda 2023 jyly Almaty oblysy Uıǵyr aýdanynda aýylsharýashylyq óndiristik kooperatıviniń tóraǵasy, analyq qoı basynyń sany jáne uryqtandyrý tásili jaıly shyndyqqa janaspaıtyn aqparatty qoldana otyryp 50 mln teńge sýbsıdııa alǵany belgili boldy.
Bunymen toqtamaı, kooperatıv tóraǵasy óziniń qylmystyq tabysyn kóbeıtý jáne zańdastyrý úshin sýbsııalaý talaptaryn eskermeı, túsken memleket qarajatynyń bir bóligin kooperatıv depozıtine aýdaryp, túsken paıdany óz qajetine jaratqan.
Sot úkimimen kooperatıv tóraǵasy memleket qarjysyn jymqyrý jáne qylmystyq paıdany zańdastyrý boıynsha kináli dep tanylyp, 6 jyl bas bostandyǵynan aıyryldy.
Sondaı-aq, Agenttik memleket qarjysyn jymqyrý úshin jaýapkershilik kózdelgendigin eskerte otyryp, ekonomıkalyq quqyqbuzýshylyqtar jaıly «AFM Insider» telegramm boty arqyly habarlaý múmkindigi baryn eske salady.
