Almaty oblysy ákiminiń orynbasary múgedektigi bar jandarǵa qatysty aıtqan sózi úshin keshirim surady

QONAEV. KAZINFORM – Talǵardaǵy Densaýlyq saqtaý mınıstrimen ótken kezdesýde Almaty oblysy ákiminiń birinshi orynbasary Qanat Esbolatovtyń múgedektigi bar adamdarǵa qatysty aıtqan sózi qoǵamda rezonans týdyrdy.

Mınıstrmen kezdesýge júzdegen turǵyn jınalǵan. Sol jıynda oblys ákiminiń orynbasary Qanat Esbolatov múgedektigi bar azamattarǵa qatysty aıtqan pikir vıdeoǵa túsip qalyp, jelide tarady.

Ol: «Múgedektigi bar adamdardyń eńsesin túsirmeıik, olardy onsyz da Allanyń ózi jazalaǵan», - dep aıtqan.

Qanat Esbolatovtyń áleýmettik jelidegi daýdan keıin ózi resmı túsinik berdi. Ol jıynǵa halyqtyń kóp jınalǵanyn aıtty.

– Densaýlyq saqtaý mınıstrimen Talǵarda ótken kezdesýge qalyń jurt jınaldy. Árqaısysy ózekti másele kóterip, suraq qoıýǵa asyqty. Sondyqtan kezek te úlken boldy, - dedi ol.

Sheneýnik kezdesýdiń tórt saǵatqa sozylǵanyn, jınalǵandardyń arasynda múgedektigi bar adamdar bolǵanyn da aıtty. Ol tártipti saqtaý maqsatynda eskertý jasaǵanyn, alaıda orys tilinde aıtqan sózinde qatelik ketkenin moıyndady.

– Reglamentti saqtaýǵa shaqyrdym. Alaıda orys tilinde aıtqan sózimde qatelik bar. Oıymdy durys jetkizbeppin. «Qudaı úlken synaq bergen» dep aıtpaq bolǵanmyn. Aıtqan sózim kópshiliktiń kóńiline, tipti namysyna tıgenin de túsindim. Osy úshin shyn nıetimmen keshirim suraımyn, - dep jazdy Esbolatov.

Eske salaıyq, buǵan deıin Shyǵys Qazaqstan oblysynda halyqqa beıádep sóz aıtqan aýyl ákimine aıyppul salynǵanyn jazǵanbyz.