Almaty mýzeıinde Ózbekáli Jánibekovke kórme ashyldy
ALMATY. KAZINFORM – Halyqaralyq mýzeıler kúni aıasynda kórnekti memleket jáne qoǵam qaıratkeri, etnograf-ǵalym Ózbekáli Jánibekovtiń ómiri men qyzmetine arnalǵan «Mádenı maıdan» kórmesi Almaty mýzeıinde ashyldy.
Kórmede qoǵam qaıratkeriniń otbasynan alynǵan fotolar, arhıvtik qujattar, eńbekteri men marapattary, kıimderi, jeke zattary, qoljazbalary, eskızderi qoıyldy. Sondaı-aq Almaty mýzeıi qorynan Ózbekáli Jánibekovtiń úlgisi boıynsha tigilgen «Sazgen sazy» ansambliniń alǵashqy oryndaýshysynyń sahnalyq kıimi, fotosýretteri, mýzykalyq aspaptary men Áziret Sultan Memlekettik tarıhı-mádenı mýzeı qoryǵynyń qorynan alynǵan jeke zattary usynyldy.
«Kórme kásibı merekemiz – Halyqaralyq murajaılar kúnine oraı uıymdastyryldy. Kórmege Ózbekáli Jánibekovtiń ózi qoldanǵan 100-den astam zattary qoıyldy. Oǵan qosa biz kórmede Ózbekáli Jánibekovtiń mýzeılerdi qurýdaǵy eńbegin aıyryqsha kórsetýge tyrystyq. Sebebi Ózbekáli Jánibekov 1971-1991 jyldardyń aralyǵynda elimizde 40 mýzeıdiń ashylýyna úles qosqan. Ol murajaılar búgingi kúnge deıin jumys istep tur. Kórme eki apta boıy bolady, kirý tegin», - dedi Almaty qalasy Mýzeıler birlestiginiń dırektory Lázzat Saǵyndyqova.
Aıta ketken jón, Ózbekáli Jánibekov – qazaq halqynyń ulttyq mádenıeti men ónerin damytý jolynda irgeli ister atqarǵan, salt-dástúrdiń, tarıhı jádigerlerdiń qaıta jandanýyna yqpal etken ult janashyry. Onyń bastamasymen Qazaqstanda júzge jýyq mýzeı men etnografııalyq zaldar ashylyp, «Sazgen sazy», «Sherter», «Adyrna», «Altynaı» folklorlyq-etnografııalyq án-bı ansamblderi, teatrlar, «Kazrestavratsııa», «Biregeı ysqymen oınalatyn mýzykalyq aspaptardyń memlekettik kollektsııasy» quryldy.
Sonymen qatar onyń arqasynda Uly dalanyń birqatar eskertkishteri saqtaldy. Qalpyna keltirilgen eskertkishterdiń qatarynda Qoja Ahmet ıAssaýı, Tájik, Qarahan, Aısha-bıbi, Aq-uıyq jáne Babadja-Hatýn keseneleri men Jarkent meshiti jáne Otyrar arheologııalyq eskertkishteri bar. Ózbekáli Jánibekovtiń tikeleı yqpalymen qazaqtyń tól meıramy Naýryz qaıta jandanyp, qasıetti Taıqazan Qazaqstanǵa qaıtaryldy.
