Almaty mýzeıi jańa jumys rejımine aýysty
ALMATY. KAZINFORM – Aqpan aıynan bastap Almaty mýzeıi jańa jumys kestesine kóshti. Mýzeı osyǵan deıin seısenbi-jeksenbi aralyǵynda saǵat 10:00-19:00 aralyǵynda jumys istegen edi.
Endi seısenbiden jeksenbige deıin saǵat 10:00-den 00:00-ge deıin kelýshilerge qyzmet kórsetedi. Qala ákimdiginiń habarlaýynsha, bul qala turǵyndary men qonaqtaryna mýzeıge tek kúndiz emes, keshki ýaqytta da barýǵa múmkindik beredi. Dúısenbi – sanıtarlyq kún.
Almaty mýzeıi – Jetisý óńiriniń tarıhı-mádenı murasyn saqtaý, jınaqtaý jáne nasıhattaýmen aınalysatyn mádenı ortalyq. Mýzeı ekspozıtsııasy ejelgi dáýirden qazirgi zamanǵa deıingi Almatynyń tarıhyn beıneleıtin 11 zaldan turady.
Mýzeı qorynda kóne eksponattar, sonyń ishinde beıneleý óneriniń týyndylary, qazaq etnografııasynyń úzdik toptamasy, túrli dáýir men mádenıettiń aıǵaǵy sanalatyn arheologııalyq zattar, jazbasha derekter jıyntyǵy saqtalǵan.
– Jumys ýaqytynyń uzartylýy mýzeıge kelýshiler aıasyn keńeıtýge, sonyń ishinde jumys nemese oqý aıaqtalǵannan keıin keshki ýaqytta mádenı oryndarǵa barý múmkindigin arttyrýǵa baǵyttalǵan, - delingen habarlamada.
Almaty mýzeıi Qabanbaı batyr, 132 mekenjaıynda ornalasqan.
Eske salaıyq, buǵan deıin Almatydaǵy Ábilhan Qasteev atyndaǵy óner mýzeıi jóndeýden keıin qaıta ashylǵanyn jazǵanbyz.