Almaty muǵalimi álemniń úzdik 50 pedagoginiń qataryna endi
ALMATY. KAZINFORM – Almatydaǵy №95 mektep-lıtseıdiń hımııa páni muǵalimi Tatıana Beloýsova Global Teacher Prize 2025-2026 halyqaralyq baıqaýynyń qorytyndysy boıynsha álemniń eń úzdik 50 pedagoginiń qataryna endi. Bul týraly qala ákimdiginiń baspasóz qyzmeti habarlady.
Tatıana Beloýsova – pedagog-sheber, «Qazaqstannyń úzdik ustazy – 2024» qurmetti ataǵynyń ıegeri. Onyń kandıdatýrasy saýalnama men qosymsha materıaldardy tapsyrýdan bastap, saraptamalyq baǵalaý jáne fınaldyq irikteýge deıingi kópsatyly kezeńderden ótken.
Álemniń eń úzdik 50 muǵaliminiń resmı tizimi 2025 jylǵy 15 jeltoqsanda Global Teacher Prize baıqaýynyń resmı saıtynda jarııalandy. Al fınalısterdi marapattaý rásimi 2026 jylǵy 1–5 aqpan aralyǵynda Dýbaıda ótetin halyqaralyq bilim berý forýmy aıasynda uıymdastyrylady.
Aıta keteıik, Qazaqstan bul bedeldi baıqaýǵa besinshi ret qatysyp otyr. Osy ýaqytqa deıin el ókilderi, bıylǵy nátıjeni qosa alǵanda, úsh márte álemniń úzdik 50 pedagoginiń qataryna engen.
Eske salaıyq, buǵan deıin 30 jyldaı muǵalim bolǵan shyǵysqazaqstandyq áıel qalaı bir jylda álemniń úzdik sadaqshysy atanǵanyn jazǵanbyz.