Almaty-Mınsk jańa halyqaralyq baǵyty iske qosylady
ASTANA. KAZINFORM — Qazaqstan men Belarýs arasyndaǵy turaqty jolaýshylar reısteriniń jalpy sany aptasyna 6 reıske deıin artady
KM Azamattyq avıatsııa komıteti ushý geografııasyn keńeıtý jáne halyqaralyq reısterdi ulǵaıtý boıynsha turaqty negizde jumys istep jatyr.
Máselen, bıyl 10 tamyzdan bastap «SCAT» qazaqstandyq áýe kompanııasy Almaty-Mınsk jańa halyqaralyq baǵyty boıynsha aptasyna 2 reıs jıiligimen (sársenbi jáne jeksenbi) tikeleı turaqty jolaýshylar reısterin oryndaýdy bastaıdy.
— Qazirgi ýaqytta Mınskige reısterdi Astana qalasynan Belarýs «Belavıa» áýe kompanııasy aptasyna 4 reıs jıiligimen oryndaıdy.
Osylaısha, Qazaqstan men Belarýs arasyndaǵy turaqty jolaýshylar reısteriniń jalpy sany aptasyna 6 reıske deıin artady, — delingen Azamattyq avıatsııa komıteti habarlamasynda.
Áýe qatynasynyń ashylýy eki el arasyndaǵy týrıstik, saýda-ekonomıkalyq jáne iskerlik yntymaqtastyqty odan ári damytýǵa yqpal etetin bolady.
Aıta ketelik Qazaqstan men Ózbekstan arasynda tikeleı áýe reısi iske qosylǵan edi.