Almaty metrosynyń jańa jelilerin salýǵa sheteldik merdigerler shaqyrylýy múmkin

ALMATY. KAZINFORM – Almatyda metronyń jańa jelilerin salý úshin sheteldik merdiger uıymdardy tartý múmkindigi qarastyrylyp jatyr. Bul týraly «Almatybasjospar» ǴZI bas dırektory Ashat Sádýov aıtty.

Onyń aıtýynsha, ózge megapolısterde mundaı aýqymdy ınfraqurylymdyq jobalar eki jylda salynady.

– Qytaı men Máskeýdiń tájirıbesin kórip otyrmyz: olar metro stantsııalaryn ǵana emes, tutas jelilerdi de óte jyldam salady. Mysaly, shartty túrde qytaılyq kompanııalarmen kelisim jasalsa, olar bir jelini eki jylda salyp shyǵýy múmkin. Sebebi olarda týnnel qazatyn tehnıka jetkilikti. Al bizde bir ǵana tehnıka bar, ol áreń jumys istep tur. Bul, eń aldymen, tehnıkanyń tapshylyǵyna baılanysty. Qalanyń jer astynda damýy – ýaqyt talaby. Birinshiden, metro – jer silkinisi kezinde panalaıtyn qaýipsiz oryn, ekinshiden, bul barlyq ekonomıkalyq salanyń damýyna serpin beredi, - dedi Ashat Sádýov.

Ol metro qurylysyna salynatyn ınvestıtsııalar uzaq merzimdi perspektıvada ózin tolyq aqtaıtynyn aıtty. Óıtkeni metro stantsııalary jolaýshylar aǵynyn jedeldetip, qalalyq ortanyń, qala ekonomıkasynyń, sondaı-aq shaǵyn jáne orta bıznestiń damýyna oń áser etedi.

Sonymen qatar «Almatybasjospar» basshysy qazirgi tańda birde-bir merdigermen naqty kelisim jasalmaǵanyn da aıtty.

– Ázirshe eshqandaı kelisim joq. Barlyǵy bıýdjet kólemin naqtylaıtyn tehnıkalyq-ekonomıkalyq negizdemeni kútip otyr. Bıýdjet kólemi belgili bolǵan soń ǵana kelissózder júrgizýge bolady. Máskeý men Qytaı sııaqty jyldam salatyndar az. Olardyń da tájirıbesi jetedi, nátıjeleri de jaqsy. Sol sebepti jobany az ýaqytta iske asyra alatyn merdigerlerge júginýdiń máni bar, - dedi ol.

Eske salaıyq, buǵan deıin Almatyda metro jelisin qala syrtyna – Alataý qalasyna qaraı uzartý múmkindigi qarastyrylyp jatqanyn habarlaǵanbyz.