Almaty metrosynyń jańa beketi 2026 jyly qańtarda ashylady
ALMATY. KAZINFORM — Almatyda metropolıtendi uzartý boıynsha qurylys jumystary júrip jatyr.
«Qalqaman» metro bekettiń qurylysy 2020 jyly bastalǵan, biraq Naýryzbaı aýdanynyń qarqyndy damýyna baılanysty 2022 jyly ornalasýy qaıta qaraldy.
Jańa joba boıynsha jerasty tonnelderiniń uzyndyǵy 1,98 km bolady, al beket Áshimov kóshesinen batysqa qaraı Abaı dańǵyly boıynda ornalasady. Bekettegi platformanyń uzyndyǵy 98 metr bolmaq. Odan bólek stantsııaǵa irgeles aýmaqta 380 avtoturaq orny jáne 28 avtobýs turaq orny qarastyrylady.
— Jobanyń bas merdigeri «BCN-Group». Sol jaq tonneldi qazý jumystary 100% aıaqtaldy. Bastapqyda eki tonneldi qazý jumystary táýligine ortasha 3 metr jyldamdyqpen júrdi. Alaıda, qurylǵylardyń biriniń isten shyǵýyna baılanysty oń jaq tonnel boıynsha tek 559 metr qazyldy, al jospar boıynsha 1587 metr bolýy kerek edi. 2024 jyly jobany jalǵastyrý úshin 28 mlrd teńge bólindi. Bul qarajatqa ekinshi tonneldi qazý, jer qazý jáne betondaý jumystary, sondaı-aq qajetti jabdyqtardy satyp alý josparlanǵan, — dep habarlady ákimdikten.
«BCN-Group» dırektorlar keńesiniń tóraǵasy Aleksandr Belovıchtiń aıtýynsha, qazir qurylys alańynda 150 maman jáne 50-den astam arnaıy tehnıka jumys istep jatyr. Almaty ákimi Erbolat Dosaev nysandy 2026 jyldyń qańtaryna deıin aıaqtaýdy mindettedi.
Eske salaıyq, buǵan deıin Almaty metrosynda poıyzdar 3 mınýt saıyn júretin bolǵanyn jazǵanbyz.