Almaty metrosynyń úsh jelisi bolady: árqaısysy qandaı satyda tur

Metropolıtenniń qoldanystaǵy jelisi 2011 jyly ashyldy. Onyń quramyna "Raıymbek batyr", "Jibek joly", "Almaly", "Abaı", "Baıqońyr", "Áýezov teatry" jáne "Alataý" beketteri kirdi. 2015 jyly taǵy eki beket - «Saıran» jáne «Máskeý» ashylsa, 2022 jyly “Saryarqa” jáne “Baýyrjan Momyshuly” beketteri iske qosyldy. Búginde metronyń birinshi jelisinde 11 stantsııa bar jáne onyń uzyndyǵy 13 shaqyrymnan asady.

Jyldam kólik túrin kúnine 100 myńnan astam jolaýshy qoldansa da, ol qaladaǵy jol-kólik máselesin túbegeıli sheshe almaı otyr. Sebebi metro qalanyń negizgi baǵyttaryn tolyq qamtymaıdy. Sondyqtan qazir metropolıtenniń qoldanystaǵy jelisin taǵy 4 beketke uzartyp, oǵan qosa áýejaı men Alataý qalasy baǵytynda ekinshi jáne úshinshi jelilerin salý josparlanyp otyr. Osy oraıda, Kazinform agenttigi metro jelileriniń árqaısysy boıynsha atqarylyp jatqany jumystardy naqtylady.

“Qalqaman” beketi jáne birinshi jeliniń jalǵasy

Qazirgi jeliniń jalǵasy retinde 2020 jyly “Baýyrjan Momyshuly” beketinen ári qaraı «Qalqaman» jobasy jyly qolǵa alyndy. Al qurylys jumystary 2022 jyly bastaldy.

Degenmen jańa bekettiń qurylysy bastapqy boljamǵa qaraǵanda baıaý júrdi. Nysannyń ashylýy merzimi keıinge shegerilip otyrdy.

Merdiger kompanııa qarjylandyrý birqalypty bólinbegendikten, jumys qarqyny tómen bolǵanyn málimdedi. Atap aıtqanda, 2020 jyly — 190 mln teńge, 2021 jyly — 600 mln, 2022 jyly múldem qarjy bólinbegen. Negizgi qarjy 2023 jyldan bastap túse bastaǵan: 9,2 mlrd (2023), 2,3 mlrd (2024), 28 mlrd (2025), al 2026 jyly taǵy 17 mlrd teńge qarastyryldy.

Naýryzbaı aýdany ákimdiginiń málimetinshe, “Qalqamanda” qazir qurylys jumystarynyń 97 paıyzy aıaqtalǵan. Joba aıasynda 350 oryndyq avtoturaq salynyp jatyr. Osy rette memlekettik satyp alý saıtynda jańa stantsııany paıdalanýǵa berýge arnalǵan iske qosý - jóndeý jumystaryna habarlandyrý jarııalandy. Qujattyń tehnıkalyq erekshelikterine sáıkes, merdiger uıym jańa bekettiń elektr, sý, jylý, jeldetý jáne qaýipsizdik júıelerin tekserip, olardy qoldanystaǵy metropolıtenniń ortalyqtandyrylǵan basqarý jelisine tolyq qosylýyn qamtamasyz etýi tıis. Oǵan 929 mln teńge jumsalmaq. Lotqa ótinimderdi qabyldaý 20 tamyz kúni bastaldy jáne 25 tamyzǵa deıin jalǵasady.

Aldaǵy jyldary «Qalqaman» beketinen «Barlyq» bazaryna deıin taǵy úsh stantsııa salý josparlanyp otyr. Jobanyń jalpy uzyndyǵy — 5,3 shaqyrym. Nátıjesinde Almaty metrosynyń birinshi jelisi 15 stantsııany birikteretin bolady.

2025 jyldyń aıaǵynda Almaty ákimi Darhan Satybaldy metropolıtendi damytý boıynsha naqty merzimderdi atady.

— Qalanyń zamanaýı kólik júıesin qalyptastyrý — Almatynyń negizgi basymdyqtarynyń biri. 2026 jyly «Qalqaman» metro beketin paıdalanýǵa berý josparlanyp otyr. Aldaǵy úsh jyl ishinde birinshi jeli «Barlyq» bazaryna deıin jetkiziledi. Qazirgi tańda metronyń ekinshi jáne úshinshi jelileri jobalanyp jatyr, — dedi Darhan Satybaldy.

Olar kelesi mekenjaılarda ornalasady:

I stantsııa — Alataý dańǵyly boıynda, Naýryzbaı aýdany ákimdigi mańynda;
 II stantsııa — Alataý kóshesi men Tóle bı kóshesi qıylysynda;
III stantsııa — «Barlyq» bazary aýmaǵynda.

Jaqyn ýaqytta atalǵan metro ýchaskesi boıynsha jobalaý-smetalyq qujattama ázirlenýi tıis. Bul jumystarǵa 2,9 mlrd teńge bólip, memlekettik satyp alý portaly arqyly jeńimpaz da anyqtaldy. Ol - “Metroproekt” JShS.

Metropolıtenniń ekinshi jelisi

Al metropolıtenniń ekinshi jelisi «Jibek joly» beketinen Almaty áýejaıyna deıin jetkiziledi jáne 14 shaqyrym bolatyn bul baǵytta 8 beket salynady. Ol Gogol kóshesi arqyly Ortalyq demalys saıabaǵyna ótedi. Ári qaraı Shyǵys avtomobıl aınalma jolyna shyǵyp, áýejaıǵa deıin jetedi.

Ótken jyly jobanyń tehnıkalyq-ekonomıkalyq negizdemesin ázirlenip jatqany habarlanǵan bolatyn. Almaty qalasy Jol ınfraqurylymyn damytý basqarmasynyń agenttikke bergen málimetine sáıkes, búginde Almaty metropolıteni ekinshi jelisiniń qurylysy boıynsha tehnıkalyq-ekonomıkalyq negizdeme ázirlenip qoıǵan. Qujat jaqynda memlekettik saraptamanyń oń qorytyndysyn aldy. Endi jobalaý-smetalyq qujattamany (JSQ) ázirleý jumystary bastalady.

- JSQ ázirleý boıynsha jumystardy osy jyly bastaý josparlanǵan. Jobalaý-smetalyq qujattamany ázirleıtin merdiger uıym bıyl anyqtalady, - dep málimdedi vedomstvodan.

Joba boıynsha metropolıtenniń ekinshi jelisiniń beketteri kelesi mekenjaılarda ornalasady:

- №1 beket – Almaty áýejaıynyń mańynda;
- №2 beket – «Nurshashqan» shaǵyn aýdanynyń aýmaǵynda;
- №3 beket – «Aport-2» saýda-oıyn-saýyq ortalyǵynyń janynda;
- №4 beket – «Jetisý» bazaryna qarama-qarsy;
- №5 beket – «Halyq Arena» sport kesheniniń janynda;
- №6 beket – Qumaı kóshesiniń Shyǵys aınalma avtomobıl jolymen qıylysynda;
- №7 beket – Ortalyq mádenıet jáne demalys saıabaǵynyń kireberisinde;
- №8 beket – «Jibek Joly» beketiniń janynda, Nazarbaev dańǵylynyń shyǵys jaǵynda.

Metro salynatyn jer daıyn ba

Joba ázirleýden bólek Almatyda ekinshi metro jelisi úshin qurylys alańdaryn daıyndaý jumystary bastalyp ketken. Byltyr qaladaǵy jer telimderi memleket muqtajyna alynatynyn jazǵanbyz.

Almaty qalasy Jer qatynastary basqarmasynyń málimetinshe, qala ákimdiginiń №01-01/1917 (12.11.2025 j.) jáne №2/195-882 (19.06.2026 j.) qaýlylary negizinde barlyǵy 130 jer ýchaskesi májbúrli túrde alynýy tıis. Osy baǵyttaǵy jumystar boıynsha qazir 58 ýchaske satyp alynǵan, 11 ýchaske sotta qaralyp jatyr jáne 38 ýchaske jumys ústinde. Odan bólek 8 ýchaske boıynsha jalǵa alý quqyǵy toqtatylǵan, 4 ýchaske ákimdiktiń turaqty jer paıdalaný quqyǵynda, 1 ýchaske «Almaty Qala Jaryq» AQ-na tıesili. Sondaı-aq 8 ýchaske memleket muqtajyna alynatyn tizimnen shyǵarylǵan.

Almaty metrosynyń úshinshi jelisi

Qalalyq metropolıtenniń taǵy bir jelisi - “Saıran” beketinen Alataý qalasyna deıin sozylady. Bul týraly byltyr belgili boldy.

2025 jyly Alataý qalasynan «Mızam» bazaryna deıin, ekinshisi — «Mızam» bazarynan «Saıran» beketine deıin eki tehnıkalyq-ekonomıkalyq negizdemeni (TEN) daıyndaý bastaldy. Bul jumystarǵa memlekettik baıqaýdyń jeńimpazy - “Ýlmad” JShS boldy. Birinshi qujatty ázirleýge 1,3 mlrd teńge, ekinshisine 890 mln teńge bólindi.

Bastapqy talap boıynsha TEN 2026 jyldyń 31 mamyrynda daıyn bolýy qajet edi. Alaıda Jol ınfraqurylymyn damytý basqarmasy qujat áli de ázirlenip jatqanyn habarlady.

- Qazirgi ýaqytta «Almaty qalasy metropolıteniniń úshinshi jelisiniń qurylysy. «Alataý» beketinen Alataý qalasyna deıingi ýchaske» nysany boıynsha tehnıkalyq-ekonomıkalyq negizdeme ázirleý boıynsha jumystar júrgizilip jatyr, - delingen vedomstvo jaýabynda.

Jospar boıynsha metronyń úshinshi jelisi 21 shaqyrymǵa sozylady. Onda 12 stantsııa bolady. Atap aıtqanda:

— № 1 beket — «Gate City» janynda, «Soltústik» kólik torabynyń aýmaǵynda;
№ 2 beket — «Kemel» shaǵyn aýdanynyń janynda;
— № 3 beket — Soltústik aınalma joly men Boraldaı kóshesi qıylysynda;
— № 4 beket — Soltústik aınalma joly boıynda, Saýda kóshesimen qıylysynda;
— № 5 beket — Soltústik aınalma joly boıynda, áskerı bólim janynda;
— № 6 beket «Kenjehan» bazarynyń janynda;
— № 7 beket — «Mızam» bazarynyń aýmaǵynda;
— № 8 beket — Soltústik aınalma joly boıynda, «ıAlıan» bazarynyń aýmaǵynda;
— № 9 beket — Soltústik aınalma joly boıynda, «Adem» saýda úıi aýmaǵynda;
— № 10 beket — Raıymbek danǵyly men Tilendıev kóshesiniń qıylysynda;
— № 11 beket — Tóle bı kóshesi men Tilendıev kóshesiniń qıylysynda;
— № 12 beket — Abaı danǵyly men Tilendıev kóshesiniń qıylysynda, “Saıran” beketiniń janynda.

Eske salaıyq, buǵan deıin «Almatybasjospar» ǴZI bas dırektory Ashat Sádýov Almatyda metronyń jańa jelilerin salý úshin sheteldik merdiger uıymdardy tartý múmkindigi qarastyrylyp jatqanyn aıtty.