Almaty metrosynyń beketterinde platformalyq esikterdi ornatýǵa 7 mlrd teńge jumsalady
ALMATY. KAZINFORM — Almaty metropolıteniniń 11 beketinde platformalyq esikter ornatylady.
Tıisti qyzmetke qatysty habarlandyrý memlekettik satyp alý saıtynda jarııalandy. Qalalyq metro beketteriniń perrondarynda ózdiginen ashylyp-jabylatyn esikterdi ornatýǵa 7 135 293 555 teńge bólingen.
Relsterdi jolaýshylardyń platformasynan bólip turatyn esikterdiń jobasyn jasaý byltyr tamyz aıynda qolǵa alynǵan bolatyn. Jobanyń tehnıkalyq erekshelikterge sáıkes, platformanyń shetinen búkil uzyndyǵy boıynsha shyny qorshaý jáne esikter ornatylady. Shyny qorshaýlar jol tonnelderi men poıyzdyń kútý aımaǵy arasyndaǵy tosqaýyl bolyp, jolaýshylar men zattardyń relsterge abaısyzda nemese ádeıi qulaýyn boldyrmaıdy. Metro vagondarymen avtomattandyrylǵan esikter sınhrondy túrde ashylatyn jáne jabylatyn bolady.
Eske salaıyq, atalǵan esikterdi ornatý jumysy Almaty metrosynda bolǵan qaıǵyly oqıǵadan keıin qolǵa alyndy. Abaı» metro beketinde 26 jastaǵy zaǵıp jolaýshy relske qulap, mert boldy.
Metrodaǵy qaıǵyly jaǵdaıdan keıin beketterde qorshaý ornatyla bastady. Biraq vagondar arasyndaǵy aýmaqty ǵana jaýyp turatyn qurylym jolaýshylardyń kóńilinen shyqqan joq.
Keıin metropolıten dırektory metroda ornatylyp jatqan qaýipsizdik qorshaýlary ýaqytsha sheshim ekenin aıtty.
