Almaty metrosynyń barlyq beketinde platformalyq esikter ornatylady

ALMATY. KAZINFORM — Almatyda metrosynyń 11 beketinde avtomattandyrylǵan platformalyq esikter ornatylady. 

«Metropolıten» mekesi relsterdi jolaýshylardyń platformasynan bólip turatyn esikterdiń jobasyn jasaý úshin Memlekettik satyp alý saıtynda habarlandyrý jarııalady.

Jobalaý-smetalyq qujattamany ázirleýdiń quny — 73 mln teńge. Ótinim qabyldaý 7 tamyz kúni bastaldy, 12 tamyz kúni aıaqtalady. Ázirge bul lotqa 4 ótinim túsken.

Habarlandyrýda kórsetilgen tehnıkalyq erekshelikterge sáıkes, platformanyń shetinen búkil uzyndyǵy boıynsha shyny qorshaý jáne esikter ornatylady. Metro vagondarymen avtomattandyrylǵan esikter sınhrondy túrde ashylatyn jáne jabylatyn bolady.

— Platformalyq jyljymaly esikter nemese platform screen doors (PSD) — bul metro jáne monorels stantsııalarynda jolaýshylardyń qaýipsizdigi úshin qoldanylatyn qorshaý júıesi. Shyny qorshaýlar jol tonnelderi men poıyzdyń kútý aımaǵy arasyndaǵy tosqaýyl bolady. Bul jolaýshylar men zattardyń relsterge abaısyzda nemese ádeıi qulaýyn boldyrmaıdy, — delingen qujatta.

Sondaı-aq bir jyljymaly quramda 4 vagon, al ár vagonda 4 esik bolǵandyqtan, bir platformaǵa barlyǵy 16 esik qajet ekeni jazylǵan.

Eske salaıyq, byltyr 10 jeltoqsan kúni Almaty metrosynda 26 jastaǵy zaǵıp jolaýshy relske qulap, mert boldy.

Keıin qaıǵyly oqıǵanyń beınejazbasy jelide tarady. Onda 26 jastaǵy jigittiń vagondar arasyndaǵy ashyq tustan relske qulap ketkenin kórýge bolady.

Metrodaǵy qaıǵyly jaǵdaıdan keıin beketterde qorshaý ornatyla bastady. Biraq vagondar arasyndaǵy aýmaqty ǵana jaýyp turatyn qurylym jolaýshylardyń kóńilinen shyqqan joq.

Keıin metropolıten dırektory metroda ornatylyp jatqan qaýipsizdik qorshaýlary ýaqytsha sheshim ekenin aıtty.