Almaty metrosyndaǵy jarnamadan qansha paıda jáne kimge túsedi
ALMATY. KAZINFORM — Keıingi jyldary Almaty metrosyn qoldanatyn jolaýshylar sany kúrt ósti. Osyǵan qaraı, metropolıten aımaǵynda ornalastyrylǵan jarnama da kóbeıip keledi. Ár metro bekette ashylǵan kommertsııalyq nysandar da az emes.
Jolaqydan jınalǵan qarjydan tys tabysqa baılanysty Kazinform tilshisi Almaty qalasy ákimdiginiń «Metropolıten» kásipornyna saýal joldap, jarnama jáne ózge de qyzmetterden alynǵan qarjy kimge túsip jatqanyn naqtylady.
Resmı jaýapqa sáıkes, jarnama jáne aqparat ónimderi qyzmetterin usyný «Metropolıten» kásipornynyń qyzmet salasynda kózdelmegen.
Sondyqtan metro bekettegi jáne jyljymaly quram vagondarynyń ishindegi bos alańdardy jalǵa berý quqyǵy Almaty qalasy memlekettik aktıvter basqarmasyna berilgen.
— «Metropolıten» kásiporny — Almaty qalasynyń metropolıten obektileriniń teńgerim ustaýshysy jáne metropolıten obektilerin tehnıkalyq paıdalaný qaǵıdalaryna sáıkes onyń saqtalýyna jáne paıdalanylýyna jaýap beredi. Jalǵa alýshylarmen jaldaý shartyn Almaty qalasy memlekettik aktıvter basqarmasy jasasady. Bul rette olardan jaldaý tólemderi kásiporynnyń emes, jergilikti bıýdjettiń kirisine túsedi, — delingen kásiporyn jaýabynda.
Sonymen qatar «Metropolıten» KMK 2022-2025 jyldar aralyǵynda jolaýshylardyń tólemderinen qansha paıda túskenin de naqtylap ótti:
- 2022 jyl — 1 186 529 675 teńge;
- 2023 jyl — 1 806 116 913 teńge;
- 2024 jyl — 2 175 748 146 teńge;
- 2025 jyl (osy jyldyń 30 sáýirdegi jaǵdaı boıynsha) — 832 155 741 teńge.
Almaty qalasy memlekettik aktıvter basqarmasynyń málimetinshe, memlekettik múlikti jalǵa berýdi kezinde Ulttyq ekonomıka mınıstri 2015 jyly bekitken.
Vedomsvto memlekettik múlikti múliktik jalǵa berý qaǵıdalaryn basshylyqqa alatynyn málimdedi.
Basqarma jaýabyna sáıkes, 2022 jyldan 2025 jyldyń mamyryna deıingi kezeńde saýda nysandary, bankomattar men vendıng avtomattaryn, sondaı-aq metropolıten stansalarynda jáne vagondarynda ornalasqan jarnama alańdaryn jalǵa berýden jergilikti bıýdjetke 430 mln 342 myń 197 teńge túsken.
Onyń ishinde:
- 2022 jyly — 61 629 676 teńge;
- 2023 jyly — 120 930 712 teńge;
- 2024 jyly — 188 982 809 teńge;
- 2025 jyly (osy jyldyń 1 mamyryndaǵy jaǵdaı boıynsha) — 58 799 000 teńge.\
Eske salaıyq, buǵan deıin Almaty metropolıteninde týrnıketterdi jańartý jumysy bastalǵanyn jazǵanbyz.