Almaty metrosyndaǵy uzyn-sonar kezek turǵyndardyń ashýyn týdyrdy
ALMATY. KAZINFORM – Almaty metropolıteniniń «Baýyrjan Momyshuly» stantsııasynda tańerteń kireberiste kezek paıda boldy. Buǵan tólem júıesi men týrnıketterdi jańǵyrtý jumystary sebep bolǵan.
Áleýmettik jelide qala turǵyny adamdardyń jınalyp qalǵanyn kórsetetin vıdeo jarııalaǵan. Vıdeoda jańa termınaldardyń bıletterdi oqýy 20–30 sekýndqa deıin sozylyp ketetini aıtylǵan.
Metropolıten ókilderi qazirgi ýaqytta «Tólem júıesi men týrnıketterdi jańǵyrtý» jobasy júzege asyrylyp jatqanyn túsindirdi. Aıtýlarynsha, joba aıasynda ámbebap týrnıketter engizilip jatqan kórinedi. Olar qaǵazdaǵy QR-kod bıletterin, bank kartalaryn, sondaı-aq Apple Pay, Samsung Pay jáne basqa da tólem qyzmetterin qabyldaı alady.
Metro málimetinshe, bul joba jolaýshylarǵa qyzmet kórsetý sapasyn arttyrýǵa jáne týrnıketterdegi adam kóp jınalýyn azaıtýǵa baǵyttalǵan. Jetondardyń ornyna QR-kody bar qaǵaz bıletterge kóshý birneshe sebeppen túsindiriledi: mehanıkalyq bólshekterdiń jıi buzylýy, olardyń qymbattyǵy jáne qosalqy bólshekterdiń tapshylyǵy, sondaı-aq «Ońaı» jáne «Avtobys» kólik júıelerimen QR tehnologııasy arqyly biriktirý múmkindigi.
QR-kody bar qaǵaz bıletter bir rettik saparlarǵa arnalǵan jáne jolaýshylarda basqa tólem tásilderi bolmaǵan jaǵdaıda paıdalanylady.
Qazirgi tańda týrnıketterdiń 50 paıyzdan astamy jańǵyrtylyp, barlyq atalǵan tólem túrlerin qabyldaıdy. QR-kody bar qaǵaz bıletter qalanyń barlyq stantsııalarynda engizilgen. Sonymen qatar, QR-kod pen jetondardy oqý ýaqyty birdeı ekeni atap ótildi. Metro mamandary jabdyqtardyń jumysyn turaqty baqylap, múmkin bolatyn aqaýlarǵa jedel áreket etip jatyr.
Aıta keteıik, ótken jyly Almaty metrosynda jolaqy tóleýdiń QR-kod arqyly júzege asatyn júıesi pılottyq rejımde iske qosylǵan.
Sondaı-aq byltyr kúzde Almaty metrosynda 2026 jyly týrnıketterdiń jańartylatyny habarlanǵan.