Almaty metrosynda tóbeleskenderge aıyppul salyndy
ASTANA. KAZINFORM — Almatyda poıyzda bastalyp, keıin metro stantsııalarynyń biriniń platformasynda jalǵasqan tóbeleske qatysqan eki azamat ákimshilik jaýapkershilikke tartyldy. Bul týraly Almaty qalalyq polıtsııa departamenti habarlady.
Vedomstvonyń málimetinshe, oqıǵaǵa polıtsııa qyzmetkerleri jedel aralasyp, janjalǵa qatysqan eki adam ustalǵan. Keıin jınalǵan ákimshilik materıaldar sotqa joldandy.
— Sot sheshimimen quqyq buzýshylar usaq buzaqylyq jasaǵany úshin kináli dep tanylyp, árqaısysyna 20 aılyq eseptik kórsetkish mólsherinde aıyppul salyndy, — delingen habarlamada.
Almaty polıtsııa departamenti qoǵamdyq kólikte qoǵamdyq tártipti buzýǵa, agressııa kórsetýge jáne ózge jolaýshylardyń qaýipsizdigine qater tóndirýge jol berilmeıtinin eskertti.
— Mundaı árbir derekke quqyqtyq baǵa berilip, kináli tulǵalar zań aıasynda jaýapkershilikke tartylady, — dep málimdedi polıtsııa.
Eske salaıyq, buǵan deıin Aqtaýda teńiz jaǵalaýyndaǵy aılaqtardyń birinde birneshe er adam jappaı tóbelesip, turǵyndardyń úreıin ushyrǵanyn jazǵanbyz.
