Almaty metrosynda jolaýshylar jolaqyny QR arqyly tóleı alady
ALMATY. KAZINFORM — 16 sáýirden bastap pılottyq rejımde jolaqy tóleýdiń jańa tásili engiziledi.
Almaty metropolıteniniń málimetinshe, bul balamaly tólem tásili jolaýshylarǵa ınternet jelisine qosylmaı-aq QR-kod arqyly jolaqy tóleýge múmkindik beredi.
Atalǵan sheshim jerasty ınfraqurylymynyń erekshelikterin eskere otyryp ázirlengen jáne metrony paıdalaný yńǵaılylyǵyn arttyrýǵa baǵyttalǵan.
QR-kod arqyly tólem jasaý úshin Onay qosymshasyn qoldaný qajet.
— Almaty metrosy kólik salasynyń ajyramas bóligi, kún saıyn metro 100 myńnan astam jolaýshyny tasymaldaıdy, onyń 65%-dan astamy Onay biryńǵaı kóliktik kartasymen jol aqysyn tóleıdi. Barlyq tólem ádisteri ádettegideı qoljetimdi bolady jáne QR-men birge jumys isteıdi, — dep habarlady metropolıten.
Eske salaıyq, 2023 jyldyń sońynda Almaty metrosynda «Face Pay» tólem tásili iske qosylǵan bolatyn.